New Delhi, Lber:
Kum shi bynta ban ïai bteng ïa ki jingïakhih halor u Arvind Kejriwal ba um shym la iehnoh kam kum u Myntri Rangbah, ka kynhun jong ka seng BJP ha Delhi, ha ka Sngi U Blei ka la thang ïa u tyngshop bad pyrta da ki kyntien kiba long pyrshah ïa ka seng AAP.
U President jong ka seng BJP ha Delhi u Virendra Sachdeva uba la lamkhmat ïa ka jingïakhih ha ka thaiñ Conaught Place pyrshah ïa u Kejriwal, u la dawa ba la dei ban ai da ka jingpynshitom kaba tyngeh pyrshah ïa u ha kaba ïadei bad ka jingjia kaba la mih na ka tnat Excise, ha kaba u la shahkem.
“Kumba ka long mynta ka kam bamsap kaba la mih na jingdie ïa ka kyiad ka long pyrshah ïa u Kejriwal ha kaba kane ka la paw pyrthei, ka sngi ha kaba ka kam bamsap kaba mih na Delhi Jal Board kan sa paw pyrthei, kan sa kham jur arshah ban ïa kane. Ka la don ka jingbitar shla jong ki paidbah jong ka Delhi pyrshah halor ka kam bamsap jong u Arvind Kejriwal bad ka seng AAP. Ngin ym sngap jar haduh ba ki kam sniew halor ki kam bamsap jong u Kejriwal kin paw pyrthei,” u la pynshisha.
Ym slem hadien ba u nongai jingmut jong ka sneg AAP ha ka ri u Kejriwal u la shahkem ha kaba ïadei bad ka jingdonkti ha ka jingpyndkoh treikam hapoh ka tnat Excise, ka seng BJP ha Delhi ka la dawa ïa ka jinghiar shuki jong u.
Ha ka Sngi U Blei, u Kejriwal, uba la don ha kti jong ka kynhun ED, u la wanrah ïa ka hukum kaba nyngkong ha kaba ïadei bad ka jingjia kaba la mih na DJB.
Kane ka jingleh, ka la pynlong ïa ka seng BJP ba kan pynjur ïa ki jingkynthoh bad halor ki kam beaiñ kumba ka la kynnoh. U Myntri Rangbah un sa don ha patok haduh ka 26 tarik, Lber.
