Shillong, Lber 25
Ka Nongthymmai SC ka la wanphai da ka jingjop kaba nyngkong ha ka lympung ïalehkai Shillong Premier League 2023 hadien ba ka la lah ban pynliem noh ïa ka Nangkiew Irat SC da 2-0 kol ha ka lah sngi U Blei ha SSA Stadium, Polo.
Kane ka nam jop ka la wan urlong lyngba u Y. Gopi Singh (58′) bad u Ïohborlang Nonglyer (66′) na ka bynta ban khur ïa ki lai point.
Ha ki jingïalehkai ba la lah ka Nangkiew Irat ka la lah ban pynliem ïa ka Sawmer SC da 2-1 kol, katba ka Nongthymmai, kaba long ka kynhun ïalehkai kaba dangthymmai ha ka sha ka SPL, ka la shah rem ha ka Rangdajied United da 1-0 kol.
Ka Nangkiew Irat’ kam shym la lah ban ïalehkai bha hynne ka sngi ha kaba ka la duh ei ïa ki lai point na ka na ka liang pyrshah. Ki rangïalehkai kiba la lah ban ïalehkai bha ha ka kylla step kum u kapten u Shaibor Nong-rum bad u M. Nikhil Raj, hynrei baroh ar ngut kim shym la lah shan hakhmat ka jingkhlaiñ bor ki rangïa -lehkai dien ka Nongthymmai. U Raj u la ïoh biang ha ka kylla miet, hynrei um shym la lah ban pynurlong.
Ka kabu ksiar jong ka Nangkiew Irat lyngba u Khangmiki Pale ha ka minit kaba 12 ka la her shabar na u diengkol, hashwa ba u Flavius Lalrua kima un ïoh ha ka minit kaba 25, hynrei u rangapkol ka Nongthym-mai u Roni Das u la lah ban pyllait na ka jingshah thep.
Ka Nongthymmai ka la ïoh ïa ki kabu kiba biang ha ka kylla step lyngba u Rudolf Shadap, hynrei um shym la lah ban pynurlong.
Dei ha ka kylla miet ba ka Nongthymmai ka la ïoh ban pynkhih jar lyngba u Gopi ha ka ba u rangpkol ka Nangkiew Irat u Vanlalhriata Chhangte um shym la lah ban khanglad na ka jingshah thep ha ka minit kaba 58.
Ka Nongthymmai ka la ïoh ban pynbud biang sa shi kol lyngba u Ïohborlang ha ka minit kaba 65. Kine ki ar kol ki la nangpynskhem shuh shuh ka Nongthymmai na ka bynta ban kynjoh sha ka thong.
Watla ka Nangkiew ka la pyrshang ban pynphai, hynrei kam shym la lah ban pynurlong bad ka la mad ïa ka jingshah rem.
Ka jingïalehkai ha ka sngi Ba-ar kan long hapdeng ka Rangdajied kaba wan ba-ar ha ka aïom ba la lah, pyrshah ïa ka Sawmer.
