Shillong, Lber 25
Wat la ka kam ïalehkai ha kane ka juk ba mynta ka dei ka lad aikam aijam, hynrei lada phai pat sha kiba bun ki samla kim don ïa ka mon ban leit pyntbit ïalade bad tang katto katne eh kiba da thrang shisha ki ban ioh kheit ia u soh jong ka jingjop.
Na ka liang u Nongsaiñ Hima ha kane ka kynti ba mynta un wanrah ia ka jingiakren bad uwei na ki rangialehkai Wushu uba da ka jingtrei shitom bad ka jingai mynsiem kiba haiing ha sem bad ruh ki nonghikai kum u Bah Donny Rafael Ranee u la lah ban kynjoh sha ka thong kaba u shym la poi pyrkhat.
Une u dei u samla Niawki Ïakai uba dei u rangialehkai Wushu, uba la lah ban pyndep ia ka jingshah hikai ha ka National Judges Training & Certificate Course -2021 lem bad ka Certificate Course kaba hynriew taiew hapoh ka Sports Coaching Session kaba naduh u bnai Kyllalyngkot haduh u Lber jong u snem 2022 bad uba long ruh kum u Coach jong ka jingialehkai Wushu na ka jylla Meghalaya.
Haba ïakren bad u Nongsaiñ Hima halor ka jingiaid lynti jong u, u Niawki ula ïathuh ba kum u khynnah samla uba wan na ka longïing kaba duna ka ïoh ka kot ula ïakynduh ïa shibun ki jingeh. “Kane ka dei ka jingpynshlur bad ka jingai mynsiem jong i mei bad kiba ha ïing ha sem nga la duriap thop ha ka kam bad tur shakhmat ban pynurlong ïa ka jingangnud.”
U Niawki ula ïathuh ruh ba u kwah bha ban ïoh ïa ka lad ban ïalehkai bad hadien ba u la ïoh jinghikai na u Bah Donny, u la bteng bad ïai trei shitom ha ka kam ïalehkai Wushu. Lada phai sha kane ka juk ba mynta ka la jyllei sa tang ki kam sniew khamtam halor ka jingngop jong ki khynnah samla kaba pynlong ïa ki ba kim don shuh ïa ka jingmut bad ka mynsiem ban ïalehkai ne ïashim bynta ha ki kam ïalehkai.
Shuh shuh u samla Niawki ula ong ba kane baroh ka dei ka jingpynïaid jong U Blei bad kum u briew uba wan na ka thaiñ nongkyndong um shym la poi pyrkhat ba un poi sha ka thong kaba u ju angnud. U la ong ruh lada ïa nujor ha kaba ïadei bad kane ka rukom ïalehkai hapoh ka Jylla lah ban ong ba kam pat don ïa ki Coach kiba biang ki ban ai ïa ki jinghikai. U la ïathuh ruh ba ha kaba nyngkong u la thep kyrteng ban ïoh ban pule ha Patiala ha kaba ka jinghikai na ka bynta ka Wushu ka don tang 25 tylli ki seat bad ma u kum uwei na ki samla u la hap ban ïakhun pyrshah ïa ki samla kiba nabar ban ïoh pule ha kane ka jaka, da kaba ïaleh bha ban pyndep ïa ki interview bad ki eksamin kiba pher bapher.
U la ïathuh ruh ba hadien ba u la shah jied ban leit pule u la ïakynduh ïa ki jingeh ba ha rukom namar um don pisa ban siew ïa ki jinglut jingsep bad dei ha kane ka por ba u nonghikai jong u, u Bah Donny ula ïarap ban ïakren bad ban siew ïa ka pisa tang ban ïoh rung ha kane ka jaka pule. U kyrmen ba ka tnat ïalehkai jong ka Jylla ruh ka la mang pisa kham kloi na ka bynta jong u ban ïoh lad ban pyndep ïa ki jingdonkam baroh.
U samla Niawki Ïakai u la pynpaw ba u la pyndep ïa kane ka jingpule bad u don ka jingkyrmen ban ïoh ïa ka kam ka jam kaba biang ba un lah ban ai jinghikai ïa ki rang bad ki ‘thei ïalehkai hapoh ka Jylla. U la ong ba lada ka sorkar ka pynkloi, u don ka jingkyrmen ba kiwei ki coach ruh kin trei shitom ban ai jinghikai bad ban don ki samla ki ban ïoh ïa ka lad ban mihkhmat ïa ka jylla bad ka ri hi baroh kawei.
Ha kaba ïadei bad ka jingdon ki jaka ai jinghikai, une u coach u la ïathuh ba ka Jylla kam pat biang lut, bad la ïohi ba ka sorkar ka kham phai khmat sha ka phutbol, hynrei kane ruh ka dei ka jingïalehkai kumta ban kiew shaphrang don kam ban pynbiang ïa kiwei ruh ba kin kiew. U la ong ruh ba ka sorkar bad ka tnat ïalehkai ka dei ban khot ïakren na ka bynta ban tip ïa ki jingdonkam kiba kum ki nonghikai ki donkam ban ai jinghikai ïa ki khynnah samla.
