Shillong, Lber 25
U President ka Voice of the People Party (VPP), Bah Ardent M. Basaïawmoit ha ka Lah Sngi U Blei u la kyntu ïa ka Regional Democratic Alliance (RDA) ban weng noh ïalade na ka thup ïakhun ilekshon sha ka Lok Sabha bad ban kyrshan noh ïa ka VPP ha kane ka kynti.
“Kane ka long ka jingkhot jong nga ïa ka RDA – UDP & HSPDP. Ki nongïalam ka RDA ki la ïohi ïa ka sur u paidbah, ki la ïohi ïa ki dur ki dar, ki la ïohi ïa ka jingtuid u paidbah sha ki jingïalang ka VPP. Lada phi kam shisha ba phi dei kita ki seng ‘riewlum kiba shisha bad phi kwah ban ïeng na bynta u paidbah, sngewbha weng noh ïalade, wan ïasnoh lang noh namar u paidbah u la don bad ngi,” la ong u Bah Basaïawmoit haba ai jingkren ha ka jingïalang ha Mawkriah.
Ha kajuh ka por, u la ban biang ba lada kitei ki 2 seng hapoh ka shatri jong ka RDA ki dei shisha ki seng ‘riewlum, kata kin sangeh noh ka jingïakhun ha kane ka ilekshon MP naba u paidbah u la dep ban rai bad ai ka jingkyrshan ïa ka VPP.
“Hynrei lada phi dang bteng ban ïakhun ïa ka ilekshon MP, phi dei tang kita ki seng ‘riewlum dur bula jong ka BJP, jong ka NPP,” u la ong.
Utei u nongïalam u la ong ruh, “Namarkata ka daw, ka por ka dang biang ïa phi ban ong ba ngin keiñ noh ïa kane ka ilekshon namar ngi dei ka seng ‘riewlum bad u paidbah u la kwah ïa ka jingkylla…u la tuid sha ka VPP bad ngi ruh ngin ïa kyrshan noh. Hangta keiñ ngin ong ba phi dei shisha kita ki seng ‘riewlum. Hynrei wat wan pynthame ïa u paidbah.”
Haba pynkynmaw ba ka BJP, NPP, UDP, HSPDP bad kawei pat (kaba la shah nguid noh) ki ïatreilang hapoh ïingdorbar thawaiñ mynta la 6 snem, u la ong ba kitei ki seng ym tang ba ki ïatreilang, hynrei ki la pynjah ruh u kiew ja, kiew doh, ka shamoit, u khaw bad mynta ki sdang ban kynnoh sa ïa u (Ardent).
Halor ka jingkheiñ nongïew, nongdie madan bad khynnah surok jong u Symbud Myntri Rangbah ka Jylla ïa ki briew kiba wan sha ka jingïalang ka VPP, u Bah Basaïawmoit u la ong, “Ngin pyni keiñ ha kane ka ilekshon MP mano ba bun…bun u nongshong ïew, bun u ‘riew madan ne bun kita kiba shong ha Secretariat. Ngi peit ha ka 4 tarik Jylliew, ngin pyni ïa ka bor jong ngi.”
Ha kawei ka liang, haba pynpaw ka jingkyrmen ba ki paidbah kin ai ka jingkyrshan ïa u kyrtong ka seng, Dr. Ricky A.J. Syngkon, u President ka VPP u la ong, “Ngi don ïa ka jingkyrmen ba ngin jop donburom haba ngi phai sha u paidbah. U paidbah mynta u la ïohi ïa ka VPP – kam dei ka seng kaba kren tang da ka ktien hynrei ka dei ka seng kaba leh ruh ïa ka kam bad ngi la nang ïoh bor na ka por sha ka por.”
Shuh shuh u la bynrap ba um artatien ba u paidbah naduh kane ka kynti ba mynta un ïa ïaid ryngkat bad ki nongïalam ka seng ban wanrah ka jingkylla da kaba sdang naduh ka ilekshon MP bad ki baroh kiwei-kiwei ki ilekshon nangne shakhmat.
