Aizawl, Lber:
Hadien ba ka seng ka liang pyrshah ka Mizo National Front (MNF) ka la dep ban pynbna ïa ka kyrteng jong u kyrtong jong ka, tang na kawei ka konstitwensi na Mazoram Lok Sabha konstitwesi ka la rai ban ïakhun ha ka ilekshon ha ka 19 tarik, Ïaïong.
U President jong ka seng MNF bad u Myntri Rangbah barim jong ka jylla u Zoramthanga ha ka sngi Thohdieng u la shah pynbna kyrteng ba un long u dkhot jong ka Rajya Sabha na ka seng, u K. Vanlalvena (54), u la shah pynbna kyrteng ba un ïakhun na kawei ka Lok Sabha konstitwensi ha ka jylla.
U nonghikai uba la kylla long u riewsaiñ pyrthei u Vanlalvena u la long u dkhot jong ka Rajya Sabha naduh u Jylliew jong u snem 2020. Ka seng ka la ai ïa ka rai halor u Vanlalvena namar ba u dkhot ka Lok Sabha ba mynta na kane ka konstitwensi, u C. Lalrosanga jong ka MNF, u lah ban ïakhun ilekshon biang sa shisien.
U heh pulit ba la iehnohkam bad u Home Secretary barim u Lalbiakzama (64) u la shah pynbna kyrteng ha ka seng Congress bad un long u kyrtong u ban ïakhun na ka Mizoram Lok Sabha konstitwensi. Ka seng kaba bat ïa ka jingsynshar ka Zoram Peoples Movement (ZPM), kan sa sa ïakhun ha ka ilekshon Lok Sabha na ka bynta ka sien kaba nyngkong.
Ka seng ka la pynïakhun ïa u Richard Vanlalhmangaiha u heh spah, ïa uba dang wan rung thymmai hapoh ka kam saiñ pyrthei, katba ka People’s Conference ka la pynbna ïa ka kyrteng jong ka Rita Malsawmi, kaba long ka nongrwai bad ka nongthaw jingrwai ba pawnam.
Ka seng BJP ka la ong ba shen kan sa pynbna ïa ka kyrteng jong u kyrtong ban ïakhun na Mizoram Lok Sabha konstitwensi. ym ka seng MNF, ne ka ZPM ki ban ïatreilang bad ka BJP ha Mizoram.
