Shillong, Lber 26
U President jong ka All India Football Federation u Kalyan Chaubey ha ka Sngi Ba-ar u la ïakynduh ïa u Sunil Chhetri ha ka ïing basa jong ka kynhun ïalehkai ka ri ha ka nongbah Guwahati bad u la ai khublei ïa utei u kapten ka kynhun ïalehkai ka ri halor ka jingkynjoh sha 150 sien ki jingïoh ban ïashim bynta ïa katei ka kynhun.
Ha kane ka sngi u President u la aiti ïa u Chhetri da ka jersey jong ka kynhun ïalehkai ïa kaba la soi da baroh ki rangïalehkai lem bad ki dkhot jong ka kynhun ïalehkai.
Hadien, u Chaubey haba pynpaw ha ka website jong ka the-aiff.com u la ong, “U Sunil u ïoh ban ïalehkai haduh 150 sien ha kaba u la lah ban kynjoh sha ka thong ha ka kam ïalehkai phutbol bad nga sngew sarong ban sakhi shaphang jong u. Nga la ong ha u kapten ba ka kynhun ïalehkai ka sngewsarong halor ka jinglah ban kynjoh ka jong u ha ka kam ïalehkai.”
“Nga la pynpaw ha u Sunil ba u dei ban sngewsarong halor ka jinglah ban kynjoh sha ka thong bad ka India ka dei ban khur ïa ka jingjop ha kane ka jingïaknieh rung sha ka World Cup.”
Na ka liang u Chhetri u la ai khublei ïa u President ka AIFF halor kane ka jingsoi lem bad ki para nongïalehkai jong ka kynhun ïalehkai ka ri. Namar kata ngi donkam ban ïalehkai bha na ka bynta ban kynjoh sha ka wat kaba lai jong kane ka lympung ïaknieh rung World Cup (qualifiers).
