Shillong, Lber 26
U kyrtong ka Voice of People Party (VPP) sha ka ilekshon Lok Sabha na Shillong konstitwensi, u Dr. Ricky A.J Syngkon u la ong ba um lah ban batai ïa ki mat ilekshon namar u dang ap ïa ka seng ban pyllait paidbah shen ha kine ki sngi.
Une u kyrtong ka VPP u la ong ïa kane hadien ba la dep ban thep kyrteng haba u jubab ïa ki jingkylli halor ka thong jong u ban leh lada u shahjied kum u MP khamtam haba u leit sha ki paidbah ban ïalap ilekshon ban pynsngew ïa ki mat ilekshon jong ka seng.
U la ong ba ïa ki mat ilekshon ka VPP, yn sa pynbna ha ka thup kular ilekshon (manifesto) ka ban sa pyllait paidbah shen ha kine ki sngi.
U la ong ruh ba ka VPP ka leit sha ki paidbah da ka nongrim jong ka synshar-khadar kaba khuid kaba lait na ka bamsap, ban ïakhun pyrshah ïa ka jingduk bad bym shah shiliang khmat, nalor ban ïada ïa ka hok ha kaba ïadei bad ka khyndew ka shyiap bad ka khaïi ka pateng.
Haba kren shaphang ki bym dei ki trai muluk (bar jylla), une u kyrtong ka VPP u la ong ba maki ruh ki donkam ban ïoh jingïada bad u sngewnguh ïa u synñiang jong ki bar jylla kiba la noh bha sha ka Jylla.
U la ong ba maki ruh ki donkam ban ïoh ka jingïada bad ka VPP ruh kan pynthikna ba ka bha ka miat jong ki kan ïoh jingïada bad ha kajuh ka por donkam ban ïada ïa ka Jylla na kito kiba beaiñ.
“Kum ka seng ngi sngewkhia halor ka hok tynrai ba la pynkupbor da ka riti synshar wat ïa kiwei ki briew ki bym dei ki Khasi” la bynrap une kyrtong ka VPP.
Haba kylli halor ka jingshah kynthoh ha u kyrtong ka RDA u Bah Robertjune Kharjahrin uba la ong ba ka jingjied napdeng ki seng riewlum ha kane ka ilekshon ka dei hapdeng u jait kmie bad jait kpa, u Dr. Syngkon u la ong ba um don ei ei ban ong ïa kata.
Shuh shuh u Dr. Syngkon u la pynpaw ka jingsngew skhem ban jop ha kane ka ilekshon namarba ka VPP ka la pynkhreh bha ban mih ïakhun ïa ka ilekshon bad la dep ïaid ha baroh 36 tylli ki konstitwensi ka Ri-lum Khasi Jaiñtia.
“Ma nga bad ka seng jong ngi, ngi sngewskhem bha ban jop namar kat shaba ngi leit, ka jingkyrshan kaba ngi ïoh na u paidbah ka long kaba jur bha bad ngi don ka jingngeit bad jingshaniah ha ki paidbah jong ki 36 tylli ki konstitwensi” u la bynrap.
Haba kylli shaphang ka jingpyndonkam ka VPP ïa ka jingieid jaitbynriew, une u nongïalam ka VPP u la la kyntait ruh ba ka VPP ka la pyndonkam kumta hynrei ka leit sha ki paidbah ban kren halor kumno ban wanrah ïa ka synshar-khadar kaba bha hapoh ka Jylla bad ban pynthikna ruh ban don ïa ka jingbishar bahok, ban weng ïa ka jingduk nalor ka jingïada ïa ka hok ki paidbah.
Halor ka jingkyrshan ka BJP ïa ka NPP, une u kyrtong ka VPP u la ong ba kane ka pyni ïa ka jinglong ba shisha jong baroh ar tylli kine ki seng saiñ pyrthei hynrei u ieh ha ka jingstad ki paidbah ban shim ïa ka rai.
