United Nations, Lber:
Hadien san bnai ba la iaid bad iai bteng ka thma hapdeng ka Israel bad ki lehnoh Hamas hapoh ka nongbah Gaza Strip jong ka Palestine, ka UN Security Council ha ka sien nyngkong eh ha ka Lah Sngi U Blei, ka la dawa ia ka Israel ba ka dei ban sangeh noh ia ka thma ha Gaza. Kane ka long ruh hadien ba ka United States kaba long ka paralok ba hajan eh jong ka Israel, ka la sangeh ban ai jingkyrshan ia ka thma jong ka Israel pyrshah ia ki lehnoh Hamas ha kane ka por.
Kumta la ong ba baroh 14 ngut ki dkhot ba kongsan jong ka Security Council ha katei ka sngi ki la wanrah ia kawei ka rai bad kata ka long ban dawa ia ka Israel ba ka dei ban sangeh noh ia ka thma hapoh Gaza.
Ha kajuh ruh ka por pat la ong ba katei ka tnat ka la bthah ruh ia ka Hamas bad ia kiwei ki lehnoh kiba la rahbor ia ki briew na Israel, ba ki dei ban pyllait lut noh ia kitei kiba ki la rahbor baroh shi katta khnang ban wanrah ia ka jingiasuk hapdeng jong ki bad ka Israel bad ban tehlakam ruh ia ki jingma kiba khraw kiba ap na ka thma jong ka Israel hapoh Gaza.
Pynban na ka liang ka Russia ha ka kynti ba khatduh ka la ai ia ka rai ba kam shym kwah ia ka jingsangeh thma ha Israel hynrei ka Russia ka ai jingkyrshan tang ia ka jingsangeh thma ba shipor khnang ba ki ri bad ki tnat bapher bapher kin ioh ban pyndep ia ki kam bad ki jingthmu jong ki na ka bynta ka bha ka miat bad ki jingdonkam ba kongsan na ka bynta ki paid nongshong shnong ka Gaza kiba la shah ktah jur naduh ba sdang jong ka thma.
La ong ba ka United States ruh kaba ju long ka nongkyrshan ba radbah jong ka Israel naduh ba sdang jong ka thma, hynrei ha kane ka por wat ka US ruh ka la sdang ban kynran dien namar ka la iohi ia ki jingma bad jingeh kiba la wan mih namar jong ka thma Israel pyrshah ia ki lehnoh Hamas kiba synshar hi ia ka nongbah Gaza Strip jong ka Palestine mynta la bun snem.
Hynrei la ong ba ki don pat kiwei ki ri kum ka Russia, China bad kiwei ki ri Arab kiba la pyrshah jur ia katei ka jingdawa ban sangeh noh syndon ia ka thma ha Gaza. Katba kitei ki ri ki la ai jingkyrshan bad kyntu ia ka Israel ba kan sangeh noh shwa tang shipor ia ka thma khnang ba yn ioh ban pynpoi ia ki lad jingiarap bad ki marbam- mardih sha ki paidbah nongshong shnong ka Gaza kiba la shong tyrkhong khlem bam- khlem dih bad kiba la kylla phetwir naduh ba wan jia ka thma hapdeng ka Israel bad ki lehnoh Hamas.
