Nongstoiñ, Lber 26
Ka Jylla ka la duh noh ïa uwei na ki khlur ïakura, u (L) Dajiedlang Mawsor uba na West Khasi Hills District hadien ka jingkhlad noh ha ka Lah Sngi U Blei.
Ka West Khasi Hills District Boxing Association ka phah ïa ka kyrwoh jingsngewlem sha ki bahaïing bahasem jong u samla (L) Dajiedlang Mawsor uba dei u khlur ïakura ba paw jong ka thaiñ. “Ka WKHBA ka dap da ka jingsngewsih kthang ïa ka jingduh noh ïa u khlur ïakura uba la wanrah ïa ka nam ka burom ïa ka thaiñ West Khasi Hills District lyngba ki lympung jingïakob ha ka Jylla kum ha ka 3rd Meghalaya Game 2019-2020 kaba la dep pynlong ha Shillong ha kaba u la khur ïa ka takma rnong bad kane ka dei ka jingsah jingkynmaw ha ki jingïathuh khana bad ha ka pateng ka ban wan jong ka kynhun ha kaba utei u samla u la wanrah nam wanrah burom u long ruh ka nuksa ba bha na ka bynta ki khun samla ha ki kam ïalehkai,” la pynpaw kat kum ka kyrwoh ba la pyllait da u President ka WKHBA u Bah D. Sun.
Ka WKHBA ka phah ka khubor sngewlem sha ki bahaïing bahasem jong u (L) Dajiedlang Mawsor halor ka jingkhlad ba kyndit jong utei u khun dap shynrang bad ai ba ka mynsiem ba kordor jong u kan shong jahthait ha ka jingsuk bad to ai ba U Blei Nongbuh Nongthaw un pyntngen ïa ka ïing ka sem baroh kawei.
