Shillong, Lber 26
Ka All India Football Federation (AIFF) pynbna ïa ka lympung ïalehkai kaba thymmai na ka bynta ki rangïalehkai kiba hapoh 20 snem ka rta ba la tip kum ka ‘Swami Vivekananda U-20 National Football Championship’.
Ïa kane ka lympung yn pynlong ha Ramakrishna Mission Ashrama kaba ha Narainpur, Chhattisgarh ha kaba la thmu ban sdang naduh u Ïaïong mynta u bnai. Ki rangïalehkai kiba lah ban ïashim bynta ha kane ka lympung ki ban long kiba la kha hadien ka 1 tarik u Kyllalyngkot jong u snem 2005 bad kim dei ban palat ïa ka 1 tarik u Nohprah jong u snem 2007.
Ka jingthmu ban pynlong ïa kane ka lympung hadien ba la pynsangeh noh ïa ka lympung ïalehkai U-21 na ka daw jong ka khlam Covid-19. Kumta kane ka lympung kan long ruh ka jingïarap ïa ki rangïalehkai ba kin ïoh ban ïashim bynta ha ka Santosh Trophy.
Kat kum ka jingpynpaw da katei ka Synjuk la ong ba ki la don haduh 32 tylli ki Synjuk ïalehkai na ki jylla bapher bapher jong ka ri kiba la pdiang ïa ka jingtyrwa ka AIFF ban wan ïashim bynta ha kane ka lympung ïalehkai U-20. Ïa ki kynhun la phiah ha ki phra tylli ki group ha kaba ka Chattisgarh kaba ïoh pynlong ia kane ka lympung, ki la don ha ka Group-B. Ïa ki jingïalehkai yn pynïalehkai ha la ki jong ki wat bad ka Group-C bad E kin ïoh ban ïalehkai nyngkong.
Ha kane ka lympung ka Meghalaya ka la don ha ka Group-F kaba kynthup lang ïa ka Rajasthan, Mizoram bad ka Maharashtra.
Ha kane ka lympung ka Megha-laya kan ïalehkai nyngkong ha ka 12 tarik u Jymmang pyrshah ïa ka Mizoram, ia ka Rajasthan ha ka 14 tarik bad ia ka Maharashtra ha ka 16 tarik.
Kiwei pat ki kynhun kiba don ha ka Group-A ki long ka Chandigarh, Himachal Pradesh, Odisha bad ka Manipur. Katba ka Chattisgarh, Pondicherry, Goa bad ka Delhi kiba don ha ka Group-B. Ha ka Group-C ki long ka Uttar Pradesh, Karnataka, Jharkhand bad ka Ladakh. Group-D ki long ka Kerala, Haryana, Andhra Pradesh bad ka Gujarat. Ha ka Group-E ki long ka West Bengal, Uttarakhand, Punjab bad ka Tamil Nadu. Group-G ki long ka Tripura, Madhya Pradesh, Assam bad ka Arunachal Pradesh. Katba ha ka Group-H ki long ka Sikkim, Telangana, Bihar bad ka Andaman and Nicobar.
Ïa ka Quarter final yn pynlong ha ka 19 tarik u Ïaïong haduh 18 tarik u Jymmang. Ia ka Semi final yn pynlong ha ka 20 tarik bad ia ka final yn pynlong ha ka 21 tarik u Jymmang.
