Shillong, Lber 26
Hynñiew ngut ki kyrtong kiba ïakhun ïa ka ilekshon sha ka Ïingdorbar Lok Sabha na Shillong bad Tura Parliamentary konstitwensi ki la thep kyrteng ha ka Sngi Ba-ar.
Saw ngut kiba thep kyrteng ki dei kiba ïakhun na Shillong konstitwensi kiba kynthup ïa u Bah Vincent H Pala uba dei u MP bad u kyrtong ka Congress, u Bah Robertjune Kharjahrin kum u kyrtong ka United Democratic Party (UDP) uba kyrshan lang da ka Regional Democratic Alliance (RDA), u Dr Ricky AJ Syngkon uba dei u kyrtong ka Voice of the People Party (VPP) bad u Prof. Lakhon Kma kum u kyrtong shimet..
Lai ngut kiba leit thep kyrteng ban ïakhun na Tura konstitwensi ki kynthup ïa ka Agatha K Sangma kaba dei ka MP bad ka kyrtong ka National People’s Party (NPP), u Saleng A Sangma kum u kyrtong ka Congress nalor u Labenn Ch Marak kum u kyrtong shimet.
Haduh mynta, baroh ki kyrtong kiba la dep ban thep kyrteng ki long 9 ngut kynthup ïa ka Kong Ampareen Lyngdoh kaba dei ka kyrtong jong ka National People’s Party (NPP) bad u Bah Peter Shallam kum u kyrtong shimet kiba la leit thep kyrteng kham hashwa.
Ka sngi ban thep kyrteng ka la sdang naduh ka 20 tarik mynta u bnai bad ka tarik bakhatduh ban thep kyrteng ki kyrtong ka dei ha ka Sngi Balang. Ka sngi ban khmih bniah ïa ki kot ki sla jong ki kyrtong kiba la thep kyrteng kan dei ha ka Sngi Palei.
Ka tarik bakhatduh ban weng kyrteng noh ki kyrtong ki bym kwah shuh ban ïakhun ïa ka ilekshon ka dei ha ka 30 tarik mynta u Lber.
Ka sngi thep vote ka dei ha ka 19 tarik u Ïaïong bad ka jingñiew vote kan long ha ka 4 tarik u Jylliew.
