Shillong, Lber 26
U Bah Vincent H Pala uba dang dei u MP ba mynta jong ka Shillong Parliamentary bad kumjuh u kyrtong ban ïakhun ïa ka ilekshon, u la ong ba um ju kwah satia ban put turoi ïa ki kam kiba u la leh bad ki jingkren kiba bun ba la kren ha Parliament.
Haba kren sha ki lad pathai khubor hadien ba la dep thep kyrteng ban ïakhun ïa ka ilekshon MP ha ka Sngi Ba-ar, u Bah Pala u la ong, “Nga la kren bun ha Parliament halor ki jingeh ka jaidbynriew hynrei ngam ju thep ha ki rynsan ‘social media’ ne ai sha ki kot khubor. Ha kane ka juk ba mynta, ïa kaei-kaei kaba nga kren, ki paidbah ki lah ban ïoh na ka website jong ka Parliament.”
U la ong ba ka Parliament ka la long ‘digital’ mynta la 5-6 snem, kumta ïa kaei-kaei kaba la kren yn lap lut na ka website. “Nga la kren halor ka ktien Khasi, ka Inner Line Permit, ka jingbym ïoh kam ïoh jam, ka Khynrnit Hynriew, ka surok bad kiwei kiwei bad kine ki kam kiba nga la leh, kin sa long ka jubab,” u la ong.
Ha kaba ïadei bad ki MP skhim, u Bah Pala u la ong, “Kam dei ba nga khlem pyndonkam bha, hynrei nga la pyntrei naba barabor ngi ïoh 5 klur ha ka shi snem, snem nyngkong ngi ïoh pura, snem ba-ar khlem ïoh, snem ba-lai na ka 5 klur la ai tang 2 klur, snem ba saw ngi ïoh, hynrei na ka bynta ka snem ba san mynta la pynkylla noh ïa ka rukom, mynshwa ha kaba la phah pisa sha DC ophis bad sa pyllait sha ki Block, mynta pat pisa buh ha SBI bad ïa ki jingmynjur la buh ha ki Portal, bad wat ka jinghikai ha ki Block ruh ki khlem ai.”
U Bah Pala u la ong, “Ïa ki skhim MP, la ju wan tohkit da ka CBI ne da kiwei pat ki MP, kumjuh ruh na ka liang jong nga, nga leit kylleng-kylleng ka Ri ban peit ba kumno kiwei ki MP ki pyndonkam ïa ki skhim. Ngam shym la pyndonkam bakla ïa ki skhim bad nga la pyntrei hok.”
Ha kaba ïadei pat bad ka jingshah rem noh ha ka ilekshon MLA kaba dang shu dep, u Bah Vincent H Pala u la ong ba ka ilekshon MLA ka ïapher na ka MP. U la ong ba ka daw jong ka jingshah rem ha ka ilekshon MLA, ka dei namar ka jingsdang slem palat.
“Nga khlem thmu ban ïaleh ïa ka ilekshon MLA hynrei namar ka jingphet ki MLA, ngam banse ïakhun bad nga la ïoh por tang khyndiat namar nga la hap ban leit kylleng-kylleng.”
