Ka jingkyrshan ka BJP ïa ka NPP, ka la shai ba ka UDP kam don bynta: Jemino

Shillong, Lber 26

U General Secretary jong ka United Democratic Party (UDP), Bah Jemino Mawthoh, u la ong ba ka jingkyrshan ka BJP ïa ka NPP ha kane ka ilekshon MP Lok Sabha ha Shillong bad Tura ka la pynshisha ba ka UDP kam don bynta bad ka BJP.

Haba ïakren bad u nongthoh khubor hadien ba la dep thep kyrteng u kyrtong ka UDP u Bah Robertjune Kharjahrin ha shlem treikam u Deputy Commissioner ka East Khasi Hills ha ka Sngi Ba-ar, u Bah Jemino u la ong baroh shi katta ki don kiba kynnoh ba ka UDP ka don bynta bad ka BJP hynrei mynta ka kynti ka la shai ba ka BJP ka la ïatreilang bad ka NPP.

Kum ban shu pynkynmaw, u Bah Jemino u dei ruh u kyrtong MP na ka UDP ha u snem 2019 ba la kyrshan da ki seng saiñ pyrthei haba ki don ha ka sorkar MDA hynrei u khlem jop.

U Bah Jemino u la ong ba ka ilekshon ha u snem 2019 ka la ïathuh bad mynta namar ha kito ki snem ki bun bha ki seng kiba wan kyrshan hynrei ym sngewthuh pat ïa ka jingkhlaiñ. Pynban mynta haba don tang ka seng lajong u sngew ba kane ka jingïakhun ka don bha ka jingkyrmen haba ki la ïatreilang bad ka seng HSPDP.

Shuh shuh u la ong ruh ba u kyrtong Congress uba la jop haduh lai sien na Shillong Parliamentary Konstitwensi um don bor shuh naduh ba kane ka seng kam don bor shuh ha Delhi bad hapoh ka jylla ruh ka don sa tang saw ngut ki MLA.

Namar kata, u la ong biang da ka jingtlot ka seng Congress ha Meghalaya ka la ïarap ïa ka seng UDP ban ïoh jingjop ha kane ka kynti namar ki la ïatreilang bad ka seng HSPDP.

Haba ïakren bad u MLA ka UDP na Mawsynram, u la ong ba ka jingmih ka VPP kan nym ktah ïa ka UDP namar ki nongkyrshan kin don beit bad ka seng UDP.

U la ong ba ïa ki nongkyrshan ka BJP u dang phah wad jingtip shano kin leit haba ka BJP ka khlem pynïeng kyrtong ha kane ka kynti.

U la ong biang lada ka jingïatreilang u Bah HM Shangpliang bad u Bah Alvin Sawkmie da ka mynsiem ka NPP ka dei ban khlaiñ.