Guwahati, Lber:
Ka kynhun Special Task Force (STF) ha Assam ki la ïoh ban kem ïa uwei u briew ba la tip kyrteng kum u Sohail Ur Rehman, uba la shah kynnoh ba u la long u nongïarap jong u Tauseef Ali Farooqui ïa uba dang shen u la shahkem halor ka jingshah pynshisha ba u la ai jingkyrshan ïa ka kynhun lehnoh ISIS ha ki lad phah khubor.
Ka kynhun jong ki shipai STF, ba la lamkhmat da u Additional Superintendent of Police jong ka Kamrup u Kalyan Kumar Pathak, ka la leit sha Lohit hostel ha IIT Guwahati na ka bynta ban kylli jingkylli ïa u Sohail bad tohkit bniah la u la don jingïadei ne em bad ka kynhun lehnoh.
U Sohail u dei u nongshong shnong na Jammu bad u dei u khynnah pule ha Prestigious Educational Institution.
Ha kaba ïadei bad kane, u Farooqui u la shahkem noh ha ki pulit hadien ba u la paw pyrthei ba u la ai jingkyrshan ïa ka kynhun lehnoh Islamic State ha kaba u la buh ha ki lad phah khubor.
Ka ïingbishar ha Guwahati ka la rai ban set ïa u da kumba 10 sngi na ka bynta ka jingtohkit.
Ki pulit ki la bteng ban pynjur ïa ka jingtohkit ha kaba ïadei bad kane ka jingjia khnang ban lap ksai shuh shuh ïa kiwei pat ki nongïarap bad ki para dkhot jong kine kiba la shahkem kiba donkti bad ka kynhun lehnoh.
Shuh shuh ki pulit ki la don ka jingkyrmen ba kin ïohkem shuh shuh ïa kiwei pat kiba la donkti bad kine ki lehnoh.
Ka jingshahkem jong u ka la long hadien ba ka kynhun NIA ka la ïoh ban kem ïa ki heh nongïalam jong ka kynhun lehnoh ISIS ha Dhubri hadien ba la ïoh jingtip na ka kynhun wad bniah shaphang jong ki.
