Shillong, Lber 26
U MP ba mynta jong ka Shillong Parliamentary, Bah Vincent H Pala, u la ong ba ka lah ban don kaei-re-kaei sha lyndet ne ka jingïasoi kular lypa halor ka jingbym pynïeng kyrtong jong ka Bharatiya Janata Party (BJP) ha Meghalaya bad ka jingshim rai ban ai jingkyrshan pura ïa ki kyrtong ka National People’s Party (NPP) ha ka ilekshon MP ka ban long ha ka 19 tarik Ïaïong, 2024.
U Bah Pala u la pynpaw ïa kane halor ka jingkylli haba kren sha ki lad pathai khubor ha ka Sngi Ba-ar hadien ba u la pyndep ban leit thep kyrteng na ka bynta ban ïakhun biang ha ka ilekshon sha ka ïingdorbar Lok Sabha.
U Bah Vincent H Pala uba dei ruh u President ka MPCC, u la ong ba ki BJP kim dei ki biej hynrei kiba stad bha, halor ka jingshim rai ban nym pynïeng kyrtong ha Meghalaya, imat ïoh ki lah ban don ka jingïasoi kular ban knieh ïa ka shuki sha dorbar Rajya Sabha. “Ka BJP kan nym leit thylli hynrei ka don beit kaei-re-kaei, ha kaba ki paidbah ha kawei ka sngi kin sa sngewthuh, bad ka jingbym pynïeng kyrtong ka BJP ka don kaei-re-kaei sha lyndet,” u la ong.
Une u kyrtong MP ka Congress u la ong ba ka la don ruh jingsngewdiaw jingsngewsih ïa ki nongïalam BJP, ba kam suitñiew ïa ka thaiñ Shatei Lam-Mihngi (NE) bad khamtam ha Meghalaya, bym buh ne pynïeng kyrtong. Ka jingbym nud ban buh kyrtong ka pyni ba ki pyrshang ban pynpait arliang ïa ka jaidbynriew nalor ba ka la shet ïa la ki nongtrei bad leh klet ïa ka Meghalaya ha kaba ka ju ïoh 10 haduh 15 persen ka jingïasam ‘vote’.
U Bah Pala u la kynthoh ruh ba ka NPP ka long kum ka nongtih thliew bad ka BJP ka ban wanrah um jakhlia, bad mynta kam don shuh kata ka jingshah teh hynrei ki la ïa pynïaid lang bad ïa ka BJP ha Meghalaya mynta la pynïaid da ka NP. Kumta kine kiei-kiei baroh ka ap ha ka jingma namar kat ka seng kaba heh bad lamkhmat ïa ka jingsynshar bad kaba la don lypa ki nongtrei bad kaba ju ïakhun ha manla ki ilekshon MP, mynta kam ïakhun shuh bad kane ka pyni ba ka don kaei-re-kaei sha lyndet ka jingthmu jong ki, ka lah ban ktah la ka dei ha ka riti synshar ka ri, ne khyrnit hynriew ne kiwei kiwei ha kaba ki paidbah ki hap ban pyrkhat bha.
U la ong ba wat la ka BJP ka la leit bad ka NPP tangba ki paidbah nongjied kin nym kyrshan hynrei ba kin wan sha Congress bad dei tang ki nongïalam ban kyrshan ïa ka NPP, ha kaba u la ïathuh ruh ba ha Jaiñtia Hills bad West Khasi Hills kiba bun kin phai sha ka Congress.
Haba kylli pat halor ka jingkynnoh ka VPP kaba ong ba ki Congress ki dei kiba kyrshan ïa ka Hindutva, u Bah Pala u la ong, “Ha kaba ïadei bad ka kam niam ne kiwei kiwei ki kam, ngi ha Congress ngi long shai lypa ba kino-kino kiba kwah ban long kano-kano ka niam, u Hindu lada u mon ban long Hindu u lah, u Khristan u lah ban mane la ka jong ka niam, ngim don ban ong eiei namar dei tang ka Congress kaba pyrkhat ïa ka riti synshar ka ri India.”
“Ngim ju tuklar ne mushlia hynrei ngi pyrkhat lang ïa baroh bad baroh ki mane ïa la ki jong ki jaid niam, ïoh don uwei ar ne uno-uno u Hindu lane u Congress uba leit mane ïa kiwei ki niam hynrei ym dei ban kynthoh kyllum ïa ka Congress,” la ong u Bah Pala bad ai nuksa “Mynta nga don ha kane ka seng, hadien katto-katne nga leit kylla noh sha kawei ka niam lane nga kren kulmar kam dei ka Conregss kaba kren kulmar hynrei ka dei ka jingkren u riewshimet, kata ka jingïapher ïoh don uwei ar u riewshimet uba leh, lada tuh uwei u Khasi ym dei ban kynnoh ïa baroh ki Khasi.”
U Bah Pala u la ong, ka dei ka jingkren u riewshimet ym dei jong ka Congress, namar dang shen la ïohi ruh ki jingkynnoh ba don ki nongïalam niam kiba sam kyiad, te kam dei pat ban kynnoh ïa baroh kawei ka niam, kumta kan long kaba bakla ban shu kynnoh kyllum, bad ka bym ïahap satia.
