Lucknow, Lber:
Kumba la ïathuh ka tyllong khubor la ong ba uwei u runar uba la kylla long u ‘riewsaiñ pyrthei u Mukhtar Ansari u la shah sumar ha ka Hospital kaba don ha Banda, Uttar Pradesh, ha ka por ba u dang don ha patok.
Ka tyllong khubor ka la ïathuh shuh shuh ba u Ansari u la shah ktah na ka Urinary Tract Infection (UTI) bad u la shah sumar hapoh Intensive Care Unit (ICU) jong ka jaka ai jingsumar, hadien ba ka kynhun jong ki doktor ki la ong ba la dei ban sumar da kaba puid ïa u.
U Ansari u la shah pynkit sha ka jaka ai jingsumar ha ka por 1 baje mynstep jong ka Sngi Ba-ar.
Kane ka la long khyndiat sngi hadien ka 21 tarik, Lber ba u Ansari u la ïathuh ha ka ïingbishar ha Barabanki ba u la sngew shitom bad u la pynshisha da kaba ong ba u la sngewthuh ba la don ba khleh bih ha ka jingbam jong u hapoh patok.
Namar ka jingsngew shitom, u Ansari um shym la leit mih ha District MP/MLA Court ha kaba ïadei bad ka mukotduma halor ka jingshah kynnoh ba la leh thok ha ka ban pynrung kyrteng ïa ka Ambulance ba la kit ïa u ha ka ban leit jingleit na patok sha ïingbishar kaba ha Punjab ha kine ki khyndiat snem ba la leit.
Ha ka jingkyrpad ba la phah lyngba u nongïasaid aiñ jong u, u Randhir Singh Suman, u la ong, “…ha ka miet jong ka 19 tarik, Lber, ïa ka jingbam jong nga la khleh da ka bih, ha kaba hadien kane nga la sngewthuh ba la don jingpher ha ka met jong nga… Nga sngew kum ba jnang bad set hapoh ryndang.”
Kumba la ïathuh ka tyllong khubor, la ong ba ka kynhun jong ki doktor ki la pynkhreh na ka bynta ban ai jingsumar ïa u Ansari bad khmih bniah ïa ka rukom long ka met jong u.
Hadien kane ki doktor ki la thoh dawai bad ong ïa ki bor pynïaid jong ka patok ba u Ansari u la shah ktah ha ka met jong u namar ka jingshah thngan jong u ha ka jing-lehniam ‘Ramzan’.
Ha kaba ïadei bad ka jingkynnoh jong u Ansari, ki bor pynïaid jong ka patok, ki la kyntait ba la don ba khleh bih ha ka jingbam bad ong ba baroh ki bam kajuh ka jingbam kumba ai sha u, ym don kiwei kiwei pat ki ban ud shitom kum ma u.
