Moscow, Lber:
Katkum ki khubor, la ong ba ka Russia ha kane ka sien kam shym treh ban kren eiei shaphang ka kynhun lehnoh Islamic State (IS) kaba la leit thombor ia ka Russia ha ka taiew ba la dep bad kaba long ruh ka kam thombor kaba shyrkhei tam ba ka Russia kam ju ioh mad shuh ha kine ki 20 snem mynta.
Katkum ki kaiphod ba la ioh lum tad haduh jong ka step Sngi Ba-ar, ki don kumba 137 ngut kiba la khlad na katei ka jingleit thombor jong ki lehnoh IS ha ka nongbah Moscow jong ka Russia katba kitei paidbah ki dang ia lehkmen bad peit kai ia ka put-ka tem ha ka Crocus City Hall kaba don ha katei ka nongbah ha ka Sngi Thohdieng jong ka taiew ba la leit.
Bad la ong ba ka kynhun lehnoh IS da lade hi kam shym la buhrieh hynrei ka la shim jingkit khlieh halor katei ka kam thombor kaba la jia ha Russia ha ka Sngi Thohdieng ha ryngkat ki dur-khih kiba katei ka kynhun lehnoh ka la pyllait ban pynshisha ba ki dei ki dkhot jong ka kiba leh ia katei ka kam pyntriem hapoh ka nongbah Moscow jong ka ri Russia.
Pynban la ong ba ka Russia kam shym nud ban kren ne pynpaw eiei haba iadei bad ka jing-leit thombor jong ka IS ha katei ka nongbah jong ka.
