Shillong, Lber 26
U Chairman ka Regional Democratic Alliance (RDA), Bah Metbah Lyngdoh ha ka Sngi Ba-ar u la pynpaw ka jingkyrmen skhem ba u kyrtong u ban mihkhmat ïa ka kynhun, u Bah Robertjune Kharjahrin un sa poi sha ka thong ha kane ka ilekshon ban wan sha ka Lok Sabha.
“Lada ngim don jingkyrmen, ngin ym wan thep kyrteng. Ngi wan hangne ban pyndep ïa ka jingthep kyrteng jong u kyrtong bad ngi don ïa ka jingkyrmen skhem,” la ong u Bah Lyngdoh haba kren sha ki lad pathai khubor hadien ka jingwan thep kyrteng u kyrtong ka RDA.
U la ong ruh ba ka jingwan mynta ka sngi kam dei ba wan tang ka UDP hynrei ha ka rynsan jong ka RDA ha kaba ka seng ka don ka jingïatreilang bad ka HSPDP ha kaba ki la pynïeng tang uwei u kyrtong.
U la ong ruh ba ha ka jingïalap ilekshon jong ka RDA, la shem ba ki paidbah ki dang don ha ka liang jong ki bad kum ka kynhun kan nang ïai trei shitom ha kine ki taïew ban wan ha shuwa ban poi ka sngi thep ‘vote’.
“Ngi da thrang dik-dik namar kane ka dei ka jingpynsawa jong u paidbah. Ngi kwah ban pynurlong ba ha kane ka ilekshon MP, kam dei shuh ban long kum kiwei-kiwei ki ilekshon MP kiba la leit noh ha kaba ki paidbah ynda ki la ïoh ïa ka risol ha ka ilekshon kaba la dep, ki khñium ïa ngi kum ki nongïalam hynrei mynta haba ngi la pynïeng tang uwei u kyrtong, ngin jop,” u la ong.
Halor ka jingkyntu ka VPP ïa ka RDA ban weng noh na ka ilekshon MP, utei u nongïalam u la ong, “Kane ka dei ka rai jong ngi, ym don mano-mano kiba lah ban phah ïa ngi ban weng ne ym weng. Kane ka shong ha ka rai jong ngi. Kaei ka rai kaba ngi shim ka dei na bynta ka bit ka biang jong baroh.”
Haba kylli, u la ong, “Ïa ka jingkynnoh jong kiwei te…ki hap ban kynnoh kumta hi, hynrei halor kiei ki nongrim, hangno ba ngi pulom, hato ngi kum ki seng ‘riewlum, kam dei ka bynta jong ngi ba ngin ïatei na bynta ka jaidbynriew, na bynta ka Jylla.”
Shuh shuh u la buh jingkylli, “Hato kaei kata ka jingbakla jong ngi. Tangba ïatrei ryngkat badno-badno, mut ym long shuh. Kaei ka jingkwah jong ki. Hynrei, kaei kaba u paidbah u la pynsngew ïa ngi ha ki por kiba la dep, ïa kane ngi kwah ban pynurlong ha kane ka ilekshon MP.”
