Shillong, Lber 26
Ka Sambo Association of Meghalaya (SAM) ka la sei haduh hynñiew ngut ki khynnah ïalehkai ki ban mihkhmat ïa ka Jylla sha ka 14th National Sambo Championship 2023-2024 ka ban long ha Haryana naduh 29 haduh 31 tarik mynta u bnai.
Kine ki khynnah kin ïashim bynta ha lai tylli ki kyrdan ïalehkai (Cadet/Junior/ Senior) na ka Elton Swer Academy (Umpling), kiba kynthup ïa ka Ïaphilabet Rani, Mewanshanlang Kharsyiemïong, Nangkitboklang Diengdoh, Amaziah Syiemlieh, Dame Hector Marboh, Hriday Tamang bd u Samuel MJ.
U Bah Eric Swer uba dei u General Secretary ka Sambo Association of Meghalaya (SAM), nyngkong u la pynpaw ban ai kitbok kitrwiang ïa kine ki khynnah ki ban leit shim bynta ha ka sien ba nyngkong jong ka rynsan National level. Ha shwa ba kin mih na ka Jylla, u Bah Elton Swer uba dei u nonghikai ïa kane ka shlem ai jinghikai ha Umpling ha ka juh ka por kum u President ka Association u la ai khublei kitbok ïa katei ka kynhun.
Kane ka jingïalehkai, ka dei ba dang shu wanrah shen ha Jylla lyngba ka synjuk ïalehkai ha ryngkat ka jingïoh ïasnoh bad ka Sambo Federation of India (SFI). Shuh shuh la ong ba ka Sambo ka dei ruh kawei na ki jingïalehkai ba la paw bha ha ki kylleng sawdong ka pyrthei bad ba la ïoh jingithuh ruh na ka (IOC) International Olympic Committee.
