Shillong, Lber 26
Ka Rangdajied United FC ka la bteng ïa ka jingjop kaba ar ha ka lympung ïalehkai Shillong Premier League Division 2023-24 hadien ba ka la lah ban pynliem noh ïa ka Sawmer SC da 3-2 kol ha ka Sngi Ba-ar ha SSA Stadium, Polo.
Kane ka nam jop ka la wan urlong lyngba ka kol kaba khatduh na u Stephan Pale na ka bynta ban pynlong ïa katei ka lahduh jong ka Meghalaya State League ban kamai 6 point na ki ar sien iakhun.
Ha kaba sdang kane ka lympung, ka Rangdajied ka la lah ban pynliem ïa ka Nongthymmai SC da 1-0 kol bad ha kane ka jingïakhun kaba ar ka la lah ban khur biang ïa ka jingjop na ka daw ka jingïakhun tyngeh ki rangïalehkai katei ka kynhun.
Mar ïasdang ka jingïakhun baroh ar ki kynhun ki la pyrshah ban ïakhun tyngeh, hynrei ka Rangdajied United ka la ïoh ban pynkhih jar nyngkong eh lyngba u Enester ha ka minit kaba 11. Hadien katto-katne por kane ka kynhun ka la pynbud biang ïa ka kol kaba ar lyngba u Ïeitlang ha ka minit kaba 25. Kine ar kol ki la ïai sah haduh kaba kut jong ka kylla step na ka daw ka jingbym lah ban pynphai da ki rangïalehkai ka Sawmer.
Ka jingpyrshang ban ïakhun tyngeh da ki rangïalehkai ka Sawmer ka la wan urlong ha ka kylla miet na ka bynta ban pynphai kylla lyngba u Mark Austin Wanswett ha ka minit kaba 55. Hadien shiphew minit une u rangïalehkai shakhmat u la pynbud biang ïa ka kol kaba ar na ka bynta ban ïakhaid mar ar kol.
Kane ka jingïakhaid ka la pynlong ïa kine ki kynhun ban ïakhun tyngeh na ka bynta ban kynjoh sha ka thong. Hashwa ban wai ka Radajied ka la lah ban pynurlong ka bynta ban thep ïa ka kol kaba khatduh lyngba u Stephan Pale ha ka minit kaba 82. Haduh kaba kut ka Sawmer kam shym la lah shuh ban pynphai bad ka la mad ïa ka jingshah rem kaba ar ha kane ka lympung.
Ka jingïalehkai ha ka sngi Balang kan long hapdeng ka Ryntih SC pyrshah ïa ka Shillong Lajong FC ha ka por 3 baje janmiet.
