Shillong, Lber 26
U kyrtong ka Voice of People Party (VPP), Dr. Ricky A.J Syngkon, u la ong ba kito kiba kynthoh ïa ka seng haba ïadei bad ka ktien Hindi ki dei ban sngap bad peit bha ïa ki jingkren jong ki nongïalam ka seng.
Une u kyrtong ka VPP u la pynpaw ïa kane haba kylli halor ka jingkynthoh ka NPP ba ka VPP ka pyrshah ban kren Hindi kumno yn jied ïa u ban leit sha Parliament.
“Kita kiba kynnoh ki dei ban sngap bha bad peit bha ïa ki jingkren jong ki nongïalam ka seng,” u la ong bad buh jingkylli kylla ïa kiba kynthoh, da kaba ong, “Mynno ngi pyrshah ïa ka ktien Hindi?”.
“Ban shu kynnoh, ban shu ïalam bakla ïa ka jingmut jingpyrkhat jong u paidbah uba la ai ka jingkyrshan ka long kaba sngewsih. Kum ki nongïalam kiba ngi khmih lynti ban ïalam ba kin pynshai ba kin kren ïa ki nongrim ki ban long ka jingkyrkhu ïa u paidbah, hynrei ka jingkynnoh kumne-kumtai ka long khyllung palat,” u la ong.
