Shillong, Lber 26
U Bah Nickson Dohling uba dei u Vice-President ka Voice of the People Party (VPP) North Shillong Konstitwensi, u la pynpaw ba u Bah Robertjune Kharjahrin u dei paralok haba u dang ïatreilang ha ka seng Hynñiewtrep Youths’ Council (HYC) hynrei um lah ban kyrshan ïa u namar u la don ha ka jong ka seng saiñpyrthei.
Haba ïakren bad u Bah Nickson ha ka por ba u la wan synran ïa u kyrtong ka VPP u Dr. Ricky A.J Syngkon ha shlem treikam jong u Deputy Commissioner ka East Khasi Hills, u la ong ba u Bah Robertjune u dei u paralok tangba um lah ban kyrshan namar u la ïakhun kum u kyrtong ka seng UDP.
U la ïathuh ba u la dep don lypa bad ka VPP naduh u snem 2022 haba u la rung lang bad u MLA ka North Shillong u Bah Adelbert Nongrum hynrei u Bah Robertjune u dang rung dang khyndiat por ha ka UDP.
U la ïathuh katba u leit jingïalang sha ki shnong bapher bapher u lap ba ki paidbah ki rhem bha ka mynsiem ban kyrshan ïa ka VPP bad kyrmen ba ha North Shillong u prah un dang khlaiñ shuh shuh.
Katba u Bah Strong Kharjana uba dei u President ka VPP North Shillong konstitwensi, u la ong ba napdeng kine ki saw ngut ki kyrtong ba la pynïeng da ki seng saiñpyrthei, u sngew ba ka VPP ka la don lypa hakhmat ban rah ïa ka jingjop.
U la ïathuh ba ha North Shillong, ka jingkyrshan ïa ka VPP kan dang bun shuh shuh ban ïa kaba ïoh ha ka ilekshon MLA.
