New Delhi, Lber:
Ka seng BJP ha ka Sngi U Blei ka la pynbna ïa ki kyrteng jong palat 111 ngut ki kyrtong ki ban sa ïakhun na ka bynta ka ilekshon Lok Sabha, ha kaba la pynhap noh ïa ki ar ngut ki Myntri jong ka sorkar kmie kiba kynthup ïa u Ashwini Kumar Choubey bad u V K Singh, nalor u MP Varun Gandhi, katba ka la pynïakhun ïa ki khlur ak phlim kiba kynthup ïa ka Kangana Ranaut bad u Arun Govil.
U Myntri jong ka sorkar kmie u Dharmendra Pradhan un sa ïakhun na Sambalpur bad u nongaiktien jong ka seng u Sambit Patra un sa ïakhun na Puri sa shisien pat hadien ba u la shahkem ha ka jingïakhun ïa ka ilekshon ha u snem 2019.
Ka seng ka la mait noh ïa ka kyrteng jong u Myntri barim jong ka sorkar kmie u Anantkumar Hegde, uba la ïohlong dkhot jong ka Lok Sabha da hynriew sien na Uttara Kannada, ha kane ka por.
Ka seng BJP ka la kyntait ban ai tiket lajan 37 ngut ki MP ki ban sa kut noh ka samoi treikam jong ki ha kane ka thup kyrteng, kynthup jong ki 9 ngut ha Uttar Pradesh, 5 ngut ha Gujarat, 4 ngut ha Odisha bad mar 3 ngut ha Bihar, Karnataka bad Jharkhand.
Ka jingdon jong kito ki MP kiba la shah pynhap noh kam kynthup lang ïa kito kiba dang jop shen ha ka jingïakhun ïa ka ilekshon Assembly kum ka Diya Kumari bad u Rajyavardhan Singh Rathore ha Rajasthan, ne kiwei pat kum u Nayab Singh Saini uba la shimti ïa ka shuki kum u Myntri Rangbah jong ka Haryana ne u MP jong ka Hisar u Brijendra Singh, uba la dep ban mih hashwa na ka seng.
Kiba bun na ki nongïalam jong ki seng saiñ pyrthei kiba la kyntiap seng bad leit ban pynïasoh bad ka seng BJP ki la ïoh nong ha kaba ki la ïoh tiket ban ïakhun na ka seng, kynthup u heh spah uba don ki karkhana u Naveen Jindal bad u Varaprasad Rao, ïa kiba dang shen ki la shah pdiang sngewbha hapoh ka seng khyndiat kynta hashwa ban pyllait ïa ka thup kyrteng, kine ki kynthup ïa ka Sita Soren, Tapas Roy bad u N Kiran Kumar Reddy.
U President jong ka seng BJP ha Kerala u K Surendra un sa ïakhun na Wayanad, ka konstitwensi ha kaba u MP u ban sa kut noh ka samoi treikam jong u bad uba long u President barim jong ka Congress u Rahul Gandhi un sa don bynta ban ïakhun biang. Ka seng BJP ka la dep ban pynbna ïa baroh ki kyrteng jong ki kyrtong ki ban sa ïakhun ha baroh 17 tylli ki konstitwensi ha Bihar.
Ha Uttar Pradesh ka seng kaba bat ïa ka jingsynshar ka la pynbna ïa palat 13 ngut ki kyrteng jong ki kyrtong. Da ka jingdon jong ki 111 ngut ki kyrtong kiba la shah pynbna kyrteng, ka seng kaba bat ïa ka jingsynshar mynta ka la dep ban pynbna ïa 398 tylli ki kyrteng jong ki kyrtong, lait noh ki saw ngut ïa kiba la weng noh ïa ka jingpynrung kyrteng jong ki hadien ba la pynshisha na ka jingkhmih bniah ba ki la don ki jingïasuhbuit sniew, na ka bynta ban ïakhun ha ka ilekshon ban jied ïa ki 543 ngut ki dkhot jong ka Lok Sabha.
