Bengaluru, Lber:
Ha kum kane ka por ba dang ïakynduh jingeh na ka jingkyrduh um ha ka nongbah Bengaluru, ki la don kumba 22 tylli ki longïing ïa kiba la shah daiñ kuna da mar T. 5,000 ha ka Bangalore Water Supply and Sewerage Board halor ka jingpynkheiñ kyndon jong ki halor ka jingpyndonkam bakla ïa ka umbam-umdih ha kiwei pat ki jingpyndonkam.
Ïa kane ka hukum la phah lajan ar taïew shwa bad ka jingpyntreikam ka la ïaid shakhmat na ka bynta ban pynshitom ïa ki nongleh pyrshah hadien ba ki la don shibun ki jingujor ba la ïohpdiang da ka Bangalore Water Supply and Sewerage Board (BWSSB) lyngba ki lad phah khubor, la ïathuh ki heh ba dei khmih. Kumba la ïathuh ka BWSSB, la ong ba ka la ïoh ban lum baroh haduh T. 1.1 lak ka kuna na kine ki 22 tylli ki longïing kiba la pynkheiñ ïa ki kyndon bad ka jingpyndonkam bakla ïa ka umbam-umdih ha ka ban sait ïa ki kali, ban ai um syntiew bad kiwei pat ki jingpyndonkam ki bym da donkam eh ha kum kane ka por ba jur ka jingkyrduh um ha kiba bun ki bynta jong ka nongbah.
Kumba la buh jingkheiñ da ka Board, la ong ba kiba bun na ki briew kiba pynkheiñ ïa ka kyndon ba la buh ki dei na Southeastern Division. Ki la don kumba 12 tylli ki jingmudui ba la ïohpdiang da ka kynhun ba dei khmih na kane ka thaiñ ha kaba baroh ka pisa ba la ïoh ba lum ka la long T. 60,000 kum ka kuna. Kumjuh T.15,000 ka kuna la ïoh ban lum na East Division katba kawei pat kaba T. 15,000 la ïoh ban lum na Southwestern Division napdeng kiwei pat.
Ha ka 7 tarik, Lber, ka BWSSB ka la pynmih ïa ka hukum kaba la khang pyrshah ha ka jingpynleh nohei ïa ka umbam-umdih hapoh ka nongbah na ka bynta ban sait ïa ki kali, ka jingshna ïing bad surok, bad kiwei pat ki jingpyndonkam kynthup ha ki Fountain. Ki Mall bad ki Cinema Hall ki la ïoh jingbit ban pyndonkam ïa ka um tang na ka bynta ban dih.
