Itanagar, Lber:
Ki lai ngut nongtih dewïong jong ka jylla Assam kiba la shah rahbor ha ki lehnoh ki la shah pyllait noh na kawei ka khlaw kaba rben kaba don hajan ka shnong Nampong kaba don ha Changlang distrik jong ka Arunachal Pradesh ha ka Sngi Thohdieng.
Kine ki nongtih dewïong ïa kiba la tip kyrteng kum u Gyan Thapa, Lekhok Bora bad u Chandan Narzari ki la shah rahbor na Phinbiro kaba hap hapoh ka Dayun Sub-division jong ka Changlang distrik, ha ka 18 tarik, Rymphang jong une u snem.
Ka la don ka kynhun ba la ïatreilang hapdeng ki shipai ka tnat Assam Rifles ha ryngkat ki pulit jong ka Assam bad Arunachal kiba la pynlong ïa ka jingleit wad ïa kine ki briew.
Kumba la suba hashwa, la ong ba kine ki briew ki la shah rahbor ha ki lehnoh ULFA (I) bad NSCN.
Ïa ka Message kaba nyngkong kaba la wan na ka kynhun lehnoh la phah sha ka jaka treikam jong ki pulit ha kaba ki la rai ban pyllait noh ïa kine ki nongtih dewïong.
Ka jingleit wad ïa kine kiba la shah rahbor ka la jur bha hadien ba la ïohpdiang ïa ka khubor ha ka sngi Palei bad hadien lai sngi, kata ha ka sngi U Blei, kine ki briew ki la shah pyllait im ha ki pulit bad ïoh leit phai ïing.
