Los Angeles, Lber:
Ha kane ka jingjia la ong ba kawei ka khynnah ka la siat iap ialade da ka suloi jong u heh pulit hapoh ka thanat pulit kaba don ha ka nongbah California jong ka United States, la iathuh ki pulit ha ka Lah Sngi U Blei.
Ia katei ka khynnah ki pulit kim shym la pynpaw kyrteng bad la ong ba katei ka khynnah ka la thiah iap ha madan jong katei ka thanat kaba ha City of Industry hajan ka nongbah Los Angeles ha ka janmiet Sngi U Blei.
Na ka liang ki pulit ki la iathuh ruh ba katba ki dang ïeng ban leit plie ia ka jingkhang, katei ka khynnah pat ka la da kloi shim hi ia ka suloi jong uwei na kitei ki heh pulit bad ha mar kata ka por ka la kloi ban siat hi noh ialade.
Kumta, ka tnat wad bniah ka la leit poi mar-mar sha katei ka thanat pulit tang mar ia ïohsngew ia katei ka khubor bad ki la kurup noh ruh ia katei ka suloi ban ioh wad bniah bad ban lap ia ka jingshisha haba iadei bad katei ka jingjia ha katei ka janmiet.
Ki bor pyniaid katei ka jaka ki la pynbna iap noh ia katei ka khynnah ha katei hi ka jaka tang hadien khyndiat por ba katei ka khynnah ka la siat-iap ialade.
Ka tnat syntiat ka la ioh jingtip na ki heh pulit jong katei ka nongbah ba katei ka khynnah ka dei kaba la shah ujor ha ki bahaiing-bahasem namar ka jingleh kulmar bad pynkulmar ha iing.
Nangta, la ong ba ki pulit ka US pat kumba ju long man ka por ki ju rah ia ka suloi haba ki leit mareh ban buddien halor kino-kino ki jingjia ba la ioh jingujor na ki paidbah.
Hynrei la ong ba ki jingjia iakynad hapdeng ki pulit bad ki ‘riew paidbah ki long kiba khah-khah bad kiba ju jia man ka por hapoh ka ri United States, ha kaba ki don kumba 1,100 tam kiba la khlad na ki jingiakynad bad ki pulit hapoh jong kine ki 12 bnai ba la leit.
Haba iadei bad kane ka jingjia, la ong ba ka tnat syntiat bad ka tnat wad bniah kan hap ban buddien bha halor ka jinglong jong katei ka khynnah bad kumjuh ruh ban tip ia kaei kaba la jia hapdeng kitei ki pulit kiba ïadon lang bad katei ka khynnah ha katei ka por.
