Shillong, Lber 26
U kyrtong shimet u ban aireng ha ka ilekshon MP sha ïingdorbar Lok Sabha, u Bah Lakhon Kma, u la ong ba ki kyrtong bad ki seng bapher-bapher ki la shu pyndonkam palat pud ïa ka kyntien ‘Ieid Jaitbynriew’ na ka por sha ka por bad u la ong ba ki kyrtong ki ju kynmaw ïa ka Jaitbynriew tang ha ka por ilekshon.
Haba kren sha ki lad pathai khubor ha ka Sngi Ba-ar ha ka por ba wan thep kyrteng ha shlem treikam Deputy Commissioner, East Khasi Hills District, u Bah Lakhon u la ong ba kine ki kyrtong kiba ong ieid jaitbynriew tang ha ka por ïalap ilekshon lada ki jop bad ki don ha ka bor, ki paidbah kin sa ïohi ïa ki jinglong bashisha jong kine ki nongmihkhmat ba kim pushe re shaphang ka Jaitbynriew.
“Ka kyntien ‘Jaitbynriew’ ka la long ka jingmlien ban shu pyndonkam palat pud da ki briew na ka por sha ka por bad ki la kynmaw ïa ka Jaitbynriew tang ha ka por ilekshon la ka long ha ka por ilekshon MDC, MP, MLA bad ha ka por ba ki jop bad ki wan ha ka bor, phin sa ïohi ba kim da patiaw than ïa ka Jaitbynriew”, la ong u Bah Kma.
U Bah Lakhon u la ong ba haba ki kyrtong ki ong ba ki ieid Jaitbynriew ki dei ban pyni da ki kam bad kumba long ym pat ju ïohi satia ïa kita ki kam. Lada ki paidbah ki jied bad ki pynjop ïa u kum u MP, un pyni ïa ka jingmut jong ka Jaitbynriew da ki kam kata ban ïarap ïa kiba duna ha ka ïoh ka kot bad kumjuh ban pynbit pynbiang ïa ka jingdonkam jong u paidbah la ka long ha sor ne ha nongkyndong ka dei ban long mar katjuh.
“Haba phi ong Jaitbynriew, pyni keiñ bad haduh mynta ngim pat ïohi, lada phi jied ïa nga kum u MP, ngan pyni ïa phi ka mut aïu Jaitbynriew”, la ong u Bah Kma.
Shuh shuh u Bah Lakhon u la ong ba ki ong ba ki ieid Jaitbynriew da kaba pynlong ïa ki paidbah ba kin wan sha surok ban ïashoh hynrei lada ki la don ha ka bor pat kim patiaw satia ïa ki paidbah.
“Balei nga khuslai ha kaba ïadei bad kine ki nongmihkhmat ba mynta ka long namar ba ki ong ba ki ieid Jaitbynriew bad kin pyrshang ban ïalam bakla ïa phi ba phin ïakhun da kaba wan sha surok hynrei lada ki don ha ka bor, kim patiaw ïa phi. Pyni ïa nga ba phi ieid Jaitbynriew bad kane ka long ka jingkylli ïa kito ki nongïalam kiba don mynta ba phin pyni ïa nga kawei ka nuksa ban ong ba phi ieid Jaitbynriew lada phi don shisha ka jingktah na ka bynta ki briew kiba jynjar ne ki briew kiba jynjar sha ki thaiñ nongkyndong, ka mut ba phi don shisha ïa ka jingkitkhlieh bad ka jingieid ïa ka Jaitbynriew bad kane kan sa wanrah jingkylla”, la ong u Bah Kma.
