Shillong, Lber 26
U kyrtong ka Regional Democratic Alliance (RDA), Bah Robertjune Kharjahrin ha ka Sngi Ba-ar u la pynkynmaw ba u nongïalam ka VPP, Bah Ardent M. Basaïawmoit u la kren teng ba ki seng bathymmai kim ju poi shano-shano.
Halor ka jingkyntu u Bah Ardent ïa ka RDA ban weng noh na ka jingïakhun bad ban kyrshan ïa ka VPP, u Bah Kharjahrin u la ong ba ka jingbym urlong jong ki mat ki jura kiba biang kumjuh ki jingdawa ban wanrah ïa ki aiñ ïada ri, ka dei namarba ym shym la ïoh shuh ïa ki MP ki ban mih na ki seng ‘riewlum la kumba 35 tylli ki snem.
“Halor ka jingkyntu u Bah Ardent, ngam don kano-kano ban pynphai ïa i, ngam kwah hi ruh ban ïania bad i. Hynrei nga shu kwah ban pynkynmaw ïa ka jingkren jong u kaba ma u hi u la ong ha Mawkyrwat ba ki seng thymmai kin ym poi shano-shano bad kata kan ïeng…sa peit ka seng thymmai kan ym poi shano-shano,” u la ong hadien ka jingthep kyrteng ban pynskhem ïalade kum u kyrtong ka RDA.
Haba kren halor ka ilekshon ban wan, u Bah Kharjahrin u la ong ba u don ka jingkyrmen kaba 100 na ka 100 ban poi sha ka thong naba u ïakhun ïa ka ilekshon da ki mat ki jura ban ïada ïa ka ri bad ka jaidbynriew bad ka Jylla.
U la ban jur ruh halor ka jingpynneh-jingpynsah ïa ki riti-dustur da ki snap kiba kyrpang, ka khyndew ka shyiap kumjuh ban kyntiew ïa ka ri bad ka jaidbynriew ha baroh ki liang.
“Haba ngi ïaid sha kita ki mat ki jura kiba biang, ngi don ka jingkyrmen ba ki paidbah nongshong shnong kin pdiang ïa kata, bad ym tang da ki mat ki jura ba ngin leit sha kane ka ilekshon, ngi leit ruh sha kane ka ilekshon da ka hok bad ka jingshisha,” u la ong da kaba bynrap, “Da kine 2 tylli, ngim don kano-kano ka jingartatien ba ngin ym dei ban poi sha ka thong ha kane ka por ba mynta.”
U la ong ruh ba u don ka jingngeit kaba skhem ban poi sha ka thong naba ki paidbah nongshong shnong jong ka Shillong Parliamentary konstitwensi ki long kiba stad bad shemphang bad kin bishar ïa ki kyrtong da ki mat ki jura bad da ka hok bad ka jingshisha.
Haba kylli, u la ong, “Ban ïada ïa ka ri bad ka jaidbynriew, ka ILP ka wan hakhmat. Ngi donkam ban ïada ïa ka khyndew ka shyiap, ngi hap ban peit ban pyntikna ba bun bah ki aiñ kiba tyngkhuh ïa ka jinglong trai ka khyndew ka shyiap kum ka MMDR Act, ngi donkam ban pynbeit ïa ka.”
Ha kajuh ka por, u Bah Kharjahrin u la ong ba u don ruh ïa ka jingthmu ban trei shitom ha ka ban pynbeit ïa u pud u sam bad ka Assam bad ban khmih bniah ïa u pud u sam hapdeng ka India bad Bangladesh nalor ka jingpynrung ïa ka ktien Khasi ha ka Khyrnit kaba phra.
“Ngi kwah ba ka Meghalaya kan don noh la ka jong ka ‘Cadre’, ban pynkhlaiñ shuh ïa ka Riti Synshar paidbah…ka ïingshari ka dei ban treikam laitluid khlem kano-kano ka jingmushlia jong ki bor Sorkar ban ïoh ïa ki hok bad kiwei-kiwei bad ban kyntiew ïa ka ïoh ka kot lem bad ki kam pynroi bapher-bapher,” la ong u kyrtong ka RDA.
