Shillong, Lber 26
Ka kynhun ïalehkai jong ka ri India ka la mad ïa ka jingshah rem ha ka Afghanistan da 2-1 kol ha ka jingïalehkai ha la ïing jong ka lympung ïaknieh rung World Cup 2026 (qualifier) kaba la long ha ka Sngi Ba-ar.
Wat la kine ki kynhun ki la ïakhaid khlem don ba thep kol dangshen ha Afghanistan, pynban ha kane ka jingïakhun kaba la long ha Guwahati ka India ka la mad ïa ka jingshah rem bad ka dang ïai sah ha ka kyrdan ba-ar jong ka Group-A.
Haba phai sha kane ka jingïakhun jong ka wat ba ar, ka India ka la ïoh ban pynkhihjar nyngkong eh lyngba ka penalty ba la shut da u kapten u Sunil Chhetri ha ka minit kaba 38. Kane ka dei ka jingïalehkai kaba 150 sien jong u Chhetri ha ki lympung ïalehkai bar ri. Kane ka shi kol ka la ïai neh haduh kaba kut jong ka kylla step na ka daw ba ka Afghanistan kam shym la lah ban pynphai.
Hadien katto-katne por ba la bteng ïa ka jingïalehkai jong ka kylla miet, ka Afghanistan ka la lah ban pynphai kylla ha ka minit kaba 70 lyngba u Rahmat Akbari na ka bynta ban ïakhaid mar shi kol.
Hapdeng kane ka jingïakhun ka Afghanis-tan ka la ïoh ban thep biang sa shi kol lyngba ka penalty ba la shut da u Sharif Mukhammad ha ka minit kaba 88 na ka bynta ban ïoh syndon ïa ka jingjop.
Haduh kaba kut jong ka jingïalehkai kaba saw, ka India ka dang ïai sah ha ka kyrdan ba-ar bad ïaryngkat mar 4 point bad ka Afghanistan kaba don ha ka kyrdan balai. Katba ka Qatar ka dang ïai bat ïa ka kyrdan ba hakhlieh jong kane ka group da kaba kamai 9 point na ki lai sien ïakhun.
Ka India kan hap ban pynkhreh biang ia ka jingialehkai ha la iing pyrshah ia ka Kuwait ha ka 6 tarik u Jylliew mynta u snem.
