Shillong, Lber 27
Ka Shillong Lajong FC ka la lah ban pynliem noh ïa ka Ryntih SC da 3-1 kol na ka bynta ban khur ïa ka jingjop ba ar ha ka Shillong Premier League 2023 kaba la long ha ka Sngi Balang ha SSA Stadium, Polo.
Kane ka nam jop ka la wan urlong lyngba ki ar kol ba la thep da u Deibormame Tongper na ka bynta ban pynlong ïa ka Lajong ban kamai 6 point na ki ar sien ïakhun ha kane ka lympung.
Ha ka taïew ba la lah ka Lajong ka la lah ban pynliem ïa ka Langsning FC da 3-2 kol, katba ka Rynith ka la ïakhaid mad 1-1 kol bad ka lahduh jong ka aïom ba la dep ka Mawlai SC.
Ha kane ka jingïakhun baroh ar ki kynhun ki la ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step. Dei ha ka kylla miet ba ka Lajong ka la ioh ban pynkhih jar nyngkong eh lyngba u Colinsalmon Lyngdoh ha ka minit kaba 57. Hadien saw minit ka Lajong ka la pynbud biang ïa ka kol kaba ar lyngba u Deibormame na ka bynta ban tam ar kol.
Wat la ka Ryntih ka la shah thep haduh ar kol, hynrei da ka jingtrei shitom ki rangïalehkai ka la pynlong ïa kane ka kynhun ban pynphai kylla shi kol lyngba u Melvin Warjri ha ka minit kaba 87.
Kumta shwa ban kut artad ka jingïalehkai u Deibormame u la lah ban thep biang sa shi kol na ka bynta ban pynlong syndon ïa ka Lajong ban khur ïa ka jingjop.
Wat la ka Lajong ka la ïaryngkat mar 6 point bad ka Rangdajied United FC, hynrei ka la tam da ka ‘goal average’ (+3 compared to +2) na ka bynta jam sha ka kyrdan ba hakhlieh jong kane ka lympung.
Ka jingïalehkai ha ka sngi Palei kan long hapdeng ka Langsning FC pyrshah ïa ka Mawlai SC ha ka por 3 baje janmiet.
