Jowai, Lber 27
Hapdeng ka jingshongshit ilekshon MP sha ka ïingdorbar Lok Sabha, la mih pynban ka jingbyrngem ban nym ïashim bynta ne ‘boycott’ ïa ka ilekshon jong ka MDC lada pynkylla ïa u pud u sam jong ka Nartiang Umladang konstitwensi.
Kane ka jingbyrngem ka la mih na ka Dorbar Shnong Nartiang kaba don hapoh ka Thadlaskeiñ C&RD Block kaba la bitar ban ïohsngew ïa ki khubor ba phiah ïa ka Nartiang Umladang konstitwensi ha ki ar ne lai bynta.
U Waheh Shnong jong ka Dorbar Shnong Nartiang u Bah Mom Phalangki ryngkat bad kiwei ki nongkitkam shnong ki la leit ban ïakynduh ïa u Chairman jong ka Delimitation Committee jong ka JHADC u Dr. D Lyngdoh ha ka 27 tarik Lber bad ki la aiti ruh ha u ïa ka dorkhas.
U Bah Phalangki u la ïathuh ba katkum katei ka dorkhas, ka Dorbar Shnong ka la dawa ban pynneh pynsah ïa ka shnong Nartiang hapoh u pud u sam jong ka Nartiang Umladang konstitwensi ym ban phiah ïa u pud u sam jong ka shnong Nartiang ha ki ar-lai konstitwensi bad kumjuh ruh ban nym ktah ïa ka jingshongsuk jingshong shngaiñ ha ka imlang sahlang.
U Chairman u Dr Lyngdoh u la ïathuh ba ka Delimitation Committee kam pat shim ïa kano-kano ka rai kaba pura haba ïadei ba kano-kano konstitwensi bad ka jingpynbeit jong ki konstitwensi kaba la lait tuh ha ki rynsan ‘social media’ ka dei ka bym pat paka.
Ïa kane ka dorkhas la aiti ruh sha u CEM jong ka JHADC Bah Thombor Shiwat ha kamra treikam jong u.
