Shillong, Lber:
Ka nongthoh khubor jong ka jylla, ka Princess Giri Rashir kaba trei bad ka lad pathai khubor EastMojo, ka la Shah pynkup burom da ka khusnam “Ramnath Goenka Award for Excellence in Journalism, 2021” hapoh ka Environment, Science, and Technology Reporting category. Ka jinglum khubor jong ka Rashir kaba la jer kyrteng ka “Choking amid coking: Meghalaya coke factories leave no room to breathe” ka la pynlong ïa ka ban ïoh ïa katei ka khusnam na ka jinglah jong ka ban ngam jylliew bad pynshai halor ki jingktah kiba mih na ki karkhana thang dewïong ha ka jylla Meghalaya. Ha katei ka jinglum thup (documentary) kaba jrong 22 minit, la pyni halor ki mat kiba ïadei bad ka jingshah ktah ki paidbah ha ki karkhana thang dewïong ha ka jylla, khamtam ha ka thaiñ East Jaiñtia Hills bad West Khasi Hills District.
Ha ka jinglum jingtip jong ka Rashir la pyni ruh ïa ki jingsniew kiba mih na kitei ki karkhana kiba ktah ym tang ïa ki paidbah nongshong shnong hynrei kumjuh ruh ïa ka mariang. Da kaba pynpaw ïa ka jingsngewnguh, na ka liang ka Rashir ka la ong ba ka dap da ka jingsngewnguh ïa ki bor ba halor kiba la lah ban ïohi bad ithuh ïa ka kam. Ka la ai ruh ïa ka jingkhublei kaba kyrpang ïa ki nongprat lynti kiba don bad ka EastMojo, namar khlem ma ki, kan nym lah ban pyndep ïa katei ka jinglum jingtip.
Halor ki mat kiba ïadei bad ka jinglum jingtip, na ka la liang ka Rashi ka la pyntip ba la ban khia halor ki mat kiba ïadei bad ka jingkynrei ki karkhana thang dewïong kiba beaiñ ha ki katto katne tylli ki thaiñ jong ka jylla Meghalaya bad halor ka jingmih jong ki jakhlia lane ki jingsniew kiba ktah ïa ka koit ka khiah jong ki nongshong shnong bad kumjuh ïa ka mei mariang. Ka la pyntip ba ka jingai mynsiem ban wad bad lum jingtip halor katei ka phang ka la sdang hadien ka jingmih jong ki jingïakhih pyrshah ïa kitei ki karkhana, bad kumjuh ruh na ka jingmih jong ki jingsngewkhia kiba la pynsawa hapoh ka Ïing Dorbar Thaw Aiñ jong ka jylla.
Ha ka jingleit wad bad lum jingtip jong ka Rashir la ïathuh ba ka la ïakynduh ïa shibun ki jingeh, kynthup ïa ka jingïoh rung ha ki jaka ba don kitei ki karkhana beaiñ bad kumjuh ruh ban prat lynti napdeng ki jaka ki bym long shngaiñ. Hynrei da ka ka jingïoh ïa ki lad jingïarap na ka Environment Coordination Committee (ECC), ka la lah ban poi sha ka thong kaba ka thrang. Ka jinglum jingtip jong ka Rashir halor kite ki karkhana beaiñ ka long kaba janai, kaba la pynlong ruh ïa ka sorkar ban kren bad khmih bniah halor ki mat kiba ïadei bad ka jingdon jong ki karkhana thang dewïong beaiñ ha ka jylla. Na ka liang ka sorkar ka la thaw ruh da ka ‘technical committee’ ban wad jingtip halor ka jingtrei kam jong ki karkhana thang dewïong beaiñ, bad pynshitom ruh ïa kito ki trai kiba pyntreikam beaiñ.
Ka jingpymih hukum jong ka High Court ban khang tala bad pynpra ïa ki karkhana thang dewïong beaiñ ka la wanrah ïa ka jingjop ïa ka ECC bad kumjuh ruh ïa ki paidbah kiba shah ktah na kitei ki karkhana beaiñ.Kum ban shu pyntip hangne, ka Rashir ka la ïatrei bad ka EastMojo naduh u snem 2019, ban lum ïa ki khubor bad ïa ki khana kiba ïadei bad ki mat kiba ktah ïa ka imlang ka sahlang, bad kumjuh ruh ban kren bad pynsngew ïa ka sur jong ki paidbah nongshong shnong ka jylla Meghalaya.
Ka Rashir ka dei ka nongthoh khubor kaba lai na ka jylla Meghalaya ka ban ïoh rah ïa katei ka khusnam, hadien ka Kong Rikynti Marwein, editor jong ka Highland Post bad u Bah Lambok Thabah (Bam Kwah ha Dwar U Blei).
