Shillong, Lber 27
Namar ka ilekshon Lok Sabha ka ban long ha ka 19 tarik Ïaïong, u Chief Secretary ka jylla, u Bah DP Wahlang, ha ka Sngi Balang u la lum ïa ka jingïalang bad ki heh sorkar ba kynthup ïa u Additional Chief Secretary Home (Police), u Dr. Shakil P. Ahammed, IAS, u Director General of Police, Dr. Lajja Ram Bishnoi, IPS, u Commissioner & Secretary, ERTS, Sanjay Goyal, IAS, Chief Electoral Officer, Meghalaya, Dr. B.D.R. Tiwari, IAS bad kiwei pat kum na ka tnat pulit bad BSF ban ïakren halor ka suk ka saiñ bad ka jinglong-jingman ha khappud.
Ha kane ka jingïalang, u Dr Bishnoi u la ai ïa ka jingbatai halor ka jinglong-jingman ka shongsuk-shongsaiñ ha ka jylla bad ha ki bynta jong ki khappud. U DGP u la pyntip halor ka jingïatreilang hapdeng ki pulit ka jylla bad ki pulit ka Assam ban pynneh ïa ka shongsuk-shongsaiñ ha ki jaka khappud.
Na ka liang ka Election Commission of India (ECI) ka la pynbeit ba kan don ka jingïalang ha ka 3 tarik Ïaïong ban ïakren halor ki jaka ha khappud.
Shuh shuh ha katei ka jingïalang la ïakren halor ki sienjam ban shim bad peitngor ïa ka ïaid ka ïeng ha khappud, jingkhanglad bad jingkem ïa ki runar, saiñdur ban peitngor bad khang ïa ki jaka rung/jaka mih ha ki khappud, bad kiwei. Kane ka long katkum u kyrwoh khubor ba la phah da u Joint Chief Electoral Officer, Meghalaya.
