Shillong, Lber 27
Hadien ka jingshah ther ki seng ‘riewlum ha kane ka Jylla kita ka United Democratic Party (UDP) bad ka Hill State People’s Democratic Party (HSPDP) ha u nongïalam ka Voice of People Party (VPP) ha ki rynsan ïalap ilekshon, u nongïalam ka UDP u Bah Paul Lyngdoh u la ong ba ka Regional Democratic Alliance (RDA) ka kham donlad ban jop namar ka jingtlot ka Congress, katba ka VPP pat ka ktem jong ka ka dei ha East Khasi Hills district.
U Bah Paul u la pynpaw ïa kane hadien ba ka VPP ka la byrngem ba kan pynhiar lut ïa baroh ki seng ‘riewlum shatrai.
“Ka RDA ka kham don ka lad ban jop na Shillong Parliamentary konstitwensi ha kane ka ilekshon Lok Sabha namar ba ka Congress ka dei ka bym larkam shuh bad ka VPP ka dei ka seng kaba kut ha kawei ka District. Ha ka jingshisha, ka Shillong Parliamentary konstitwensi ka ju dei ka ktem jong ka Congress hynrei ka saiñ pyrthei ha India ka la kylla mynta bad kane kan ïarap ïa ka seng ‘riewlum kum ka UDP bad ka kynhun synrop hapoh ka RDA,” la ong u Bah Paul, uba dei ruh u Myntri ka Sorkar MDA 2.
Halor ka jingkyrshan ka BJP ïa ka NPP, u la ong ba ha ka jingshisha, ka don ka jingbym kwah ïa ka BJP bad ka jingbym buh kyrtong ha Meghalaya ka pyni ba ki tip ba kam don jingmut ïa ki ban buh kyrtong. Mynta ka kynti ka don ka jingbym kwah shuh ïa ka BJP bad ka Congress namar ka dei ka bym larkam shuh, kumta ki paidbah kin vote shano,” u la buh jingkylli da kaba kdew ba ka vote kan leit sha ka RDA.
Haba kdew ba ka VPP ka dei kaba dang mih thymmai ha ka saiñ pyrthei, u la ong ka VPP kam don satia ïa ki ktem hangno-hangno ruh lait ha East Khasi Hills District
U la ong ba kumno yn khot ïa ka VPP ka seng ‘riewlum haba ka don tang ha kawei ka district napdeng ki 12 tylli ki District ka Meghalaya bad ym lah ban khot ïa ka kum ka seng ‘riewlum bad kam dei ruh ka seng saiñ pyrthei ha Jylla hynrei tang ha kawei ka District.
Haba pynshong nongrim ïa ka RDA, u Bah Paul u la ong, “Ngi ïakhun ha ka jylli kaba ka National Party kaba lamkhmat ïa ka Sorkaar ha ka ri kam ïakhun ïa ka ilekshon bad ka NPP ka la jied ban ïatreilang bad kata ka seng. Ka Meghalaya ka la ju ‘vote’ pyrshah ïa ka BJP, bad mynta ka Congress ka dei ka bym larkam, katba ka VPP ka don tang ha East Khasi Hills. Kumta, mano ba donlad bha ban jop, ka shong ha phi ban kheiñ jingkheiñ.”
U la bynrap ba ka UDP ka dei kaba lamkhmat ha Rilum Khasi Jaiñtia ha ka jingdon ki MLA.
“Ka jingshisha ka long ba ngi don 12 ngut ki MLA bad ngi la jop bun eh ki konstitwensi na Khasi Jaiñtia. Ka don ka sien ba ka UDP ka la jop 7 na ka 7 tylli ki konstitwensi ha Rilum Jaiñtia. Kumta lada ïanujor bad ka NPP, ka jop khyndiat eh ki konstitwensi bad nalor kane, wat ha ki ADC, ka dei ka UDP kaba jop bun. Hynrei namar ka jingbym treikam ka aiñ kaba khang ban kyntiap seng (Tenth Schedule), ka la don ka jingkyntiap seng sha ka NPP kaba ïalam mynta ïa ka EC ha KHADC,” la ong.
