Jerusalem, Lber:
U President barim jong ka United States- u Donald Trump, ha kane ka por u la kren shaphang ka thma jong ka Israel pyrshah ia ki lehnoh Hamas hapoh Gaza, ha kaba u la ong ba ka jingleit thombor jong ki lehnoh Hamas ia ka Israel ha ka 7 tarik u Risaw ka long shisha ka bym lah ban pdiang bad kaba bakla shibun eh, hynrei ha kajuh pat ka por u la ong ba ka jingleit hiar thma ba khlem sangeh jong ka Israel ia ka nongbah Gaza pat ka la long kaba bakla bad ka long ruh ka jingma kaba khraw ia kiwei ruh ki ri ka pyrthei namar ka lah ban wanrah ia ki thma kiba bun lada ym lah ban pynsangeh noh ia katei ka thma ha kane ka por.
Namar kumba la iohi hi ba shibun bah ki mynsiem briew ki la shu duh ei hapoh Gaza namar ka jingleit hiar thma jong ki shipai ka Israel naduh duriaw, ryngkew bad khamtam eh nalor suiñ bad kaba la ktah jur bha ia ka jinglong- jingman jong ki paidbah nongshong shnong ka Gaza, ha kaba kim ioh shuh ia ka jingim kaba suk- ba shngaiñ bad kim ioh shuh wat tang ia ka bam- ka dih ne ki dawai ki dashin nalor ka jingkylla phetwir jongki naduh ba sdang jong ka thma ka Israel bad ki lehnoh Hamas mynta la bun bnai.
