Shillong, Lber 27
U President ka National People’s Youth Front (NPYF) Meghalaya, Bah Kitborlang Nongrem, u la ong naduh ba la mih ka Voice of the People Party (VPP), ka la wanrah ïa ka dur kaba sniew ha ka jingmut jingpyrkhat bad kim burom shuh wat ïa ki kynthei khynnah ne ki nongïalam Balang ruh.
U Bah Kitborlang u la kren bad pynpaw ïa kane ha ka jingïalang pdiang ïa ki nongkyrshan ka Congress Mylliem sha ka NPP kaba la long ha ka Lah Sngi U Blei ka 25 tarik u Lber ha Nongkseh Indoor Hall ha Nongkseh.
Une u nongïalam ka NPYF u la ong, ka jinglong jingman jong ka politik ha kine ki sngi ba mynta ka la pher bha na ka jingmih bad jingïakren jong kawei ka seng bad ong “Ha u snem 2023 wat la ngi la shah kynthah bad shah kynnoh hynrei ngi long jemnud bad katba dang ïaid ki sngi bad ki por la ïohi ïa ka jingshah ïalam bakla jong ki nongshong shnong ba lui-lui.”
U Bah Kitborlang Nongrem u la ong ba ka jingmih kane ka seng thymmai (VPP) ka la wanrah ïa kaei-kaei ka bym itynnad ha ka jinglong-jingman ka saiñ pyrkhat jong ki briew, ka wanrah jingbym sngewtynnad shiparalok, wanrah ka dur bym itynnad ban peit ha ki rynsan ‘youtube’.
U la ong ba baroh shi katta na ka liang ki seng saiñ pyrthei bapher-bapher ki ïada ïa la ki seng haba ki ïakren ha ki rynsan ne ha ki ilekshon bad ruh ban pynpaw ïa la ki nongrim bad kam ju don ka ban shu beiñ bad kynthoh.
“Ngi ïakren ïather ha rynsan na ka bynta ka seng, hynrei kam ju jia koit ban kren da ki ktien bym dei, ban kynnoh ïa ki nongïalam shnong, nongïalam seng, nongïalam niam, hynrei ka VPP ka la wanrah shisha ka dur kaba sniew ha kaba wat ïa ki kynthei khynnah, nongïalam Balang kim kheiñ shuh ban kren da ki ktien bym ïahap,” u la ong.
Une u nongïalam ka NPYF u la ong, “Ngam kwah ban da kdew kti than ïa kine kiei-kiei baroh kiba ki paidbah ki la sakhi lyngba ki rynsan ‘social media’ ïa ki jingkren ki nongïalam jong ki.”
