NANGKYNTIEW S. WARJRI
Ha kaba nyngkong eh nga pynpaw ka jingsngew-nguh ïa U Blei, ïa ka jingieit jong U ïa kaba u la don ryngkat lem bad ngi ha kine ki sngi ki por kiba la leit noh baroh. Lyngba kane ka artikl, nga shim ïa kane ka lad ban pynkynmaw lang ïa ngi baroh namar kane ka taïew kaba long ka taïew kaba kyrpang ha ka jingngeit jong ngi ki Khristan, ka taïew ka jingpyndep u Khrist ïa ka jutang lyngba ka jingshah ïap halor ka diengphna.Te kane ka artikl ka dei ka jingthoh ban pynkynmaw ïa baroh kiba ngeit shaphang ka ‘Good Friday’- Ka sngi thohdieng kaba bha namar ha lyndet jong ka don ka sngi ka jingjop u Jisu Khrist ïa ki kynjri ka jingïap bad ka pop.
Ka ktien U Blei ka ong, “uba da lade hi u la bah noh ïa ki pop jong ngi ha ka met jong u halor kata ka dieng, ba, haba la ïap noh sha kita ki pop, ngin ïoh im sha ka hok : uba da ki jingjngemsnam jong u la pynkhiah ïa phi”.(1 Petros 2:24)
Ka khubor shaphang ka ‘Good Friday’, ka long ka sngewktah shisha ïa ngi kum kiba ngeit namar la pynshitom beiñ ïa U Jisu Khrist namar ki pop ki jong ngi hynrei kaba sngewkmen eh ka long, U la jop ïa ki da kaba u la siewspah halor ka Diengphna ba ngin ïoh im sha ka hok jong U. Namarkata, kum ki Khristan ngi don ka jingthrang ban kylla kaba mut ban im ka jingim kaba bha bad ban ïaid ruh katkum ka mon jong U Blei. Te, mynta ngin ïa peit katto-katne ki jingjia kiba pynkynmaw ïa ngi ha ka por ka jingshah sahnarphna ïa u Jisu.
Kaba nyngkong ka long, ka jingpynkynmaw ïa ngi ïaka jingïaid lynti u Jisu sha u Lum Kalbari kaba thew ruh ïa ka lynti jong ka jingpynïasuk.(Lk 23: 33-34). Ngi kynmaw ba dei hangne ha ki kjat jong ka diengphna, ha u Lum Kalbari ba ka mon jong U Blei bad u khun bynriew la pynïasuk.
Kaba ar ka long, ka jingpynkynmaw ïa ngi shaphang ka jingbah u Jisu ïa ka diengphna sha u Lum Kalbari. Kane ka jingbah ïa ka diengphna ka pynpaw ïa ka jingjynjar kaba ngi hap ban kit bad ban ïaid lyngba kum kiba ngeit khnang ba ngin ïoh ïa ka jingsuk kaba U la kular.( Mat 16:24-26). Ngi dei ban kynmaw ba ngi dei ban shah jynjar ha ki jingim jong ngi kum kiba ngeit haba ngi dang don ha kane ka pyrthei namar ka jingshah shitom ka long ka jingaiti kum ka jingkñia ha khmat u Blei.
Kaba lai ka long, ka jingpynkynmaw ïa ka jingieit bah ka jong U Blei ïa ka pyrthei da kaba u la aiti ïa u Jisu ban shah halor ka diengphna ban kit ïa ki pop bad ban pynim ïa ngi. (Ioan 3:16). Ngi kynmaw ba U Jisu u la aiti ïaka jingim ban map ïa ngi na ka jingjynjar ka pop bad ruh u la ai ka jingim bymjukut ïa ngi.
Kumta, ka ‘Good Friday’ ka dei ka sngi ka jingïateh jutang kaba thymmai hapdeng jong ngi bad U Blei lyng-ba u Jisu Khrist. Ka ‘Good Friday’ ka dei ruh ka kular u Jisu Khrist ïa kita kiba ngeit bad kiba bud ïa U ban ai ïa ka jingpynim kaba bymjukut. Namarkata, ka sngi jong ka jingshah jynjar u Trai ka la long ka sngi ka jingsngewsih hynrei kaba wan ryngkat ruh bad ka sngi ka jingkmen ïa ngi, ka sngi ka jingjop ïa ki pop (Easter Sunday); ka long ruh ka sngi jong ka jingkyrmen kum kiba ngeit bad kiba leh ïa ka mon jong U ïa kaba ngi khmih lynti ban ïoh ïa ka lawei kaba phyrnai.
Khublei shibun
(U nongthoh u dei u khynnah pule jong ka JRTC, Mawklot. reach@[email protected])
