Shillong Lber 27
U nongïalam ka National People’s Party (NPP) ha East Khasi Hills district uba dei ruh u Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem u la ong ba kane ka Sorkar kaba ïalam da ka NPP naduh 2018 haduh mynta, ka dei ka Sorkar jong u paidbah kaba jem bad ka ailad ïa ki kynhun bapher-bapher ban pynsngew ïa ki jingeh, bad u la buh jingkylli ïa ka Voice of People Party (VPP) kaba kynnoh leh donbor ïa kane ka Sorkar MDA.
U Bah Pynïaid u la pynpaw ïa kane haba pyn -phai nia ïa ka jingkynthoh u nongaiktien ka VPP u Bah Batskhem Myrboh uba la kynnoh ba ka Sorkar MDA ka leh donbor.
“Kane ka Sorkar kaba ïalam da ka NPP ka la don naduh 2018 haduh mynta bad ka dei ka Sorkar kaba jem bad kaba ailad ïa ki paidbah bad ki kynhun bapher-bapher ban pynsngew ïa ki jingeh jong ki bad shim ki lad ki lynti ban pynbeit ïa ki jingeh,” la ong u Bah Pynïaid.
Hynrei u la buh jingkylli kylla ïa ka VPP bad ki MLA jong ka kiba la don naduh ka por jong u Dr Mukul Sangma kum u Myntri Rangbah ka Jylla da ka kylli, hato ka Sorkar ha kato ka por kam dei mo kaba leh donbor?
U Bah Pynïaid u la ong ruh ba lada kita ki nongïalam ka VPP ki kam ïalade ba ki dei ki briew kiba ieid jaidbynriew, hato ki la lah ban leh eiei ha kaba ïadei bad ka jingeh bad ki jingdonkam jong u paidbah? Hynrei kine ki lapmiet tang ka aidaw ba kim don ha ka bor synshar.
Kumta une u CEM ka KHADC u la ong ba lada dei shisha ba ki nongïalam ka VPP ki ieid jaidbynriew kam pher lada don ha ka liang synshar ne liang pyrshah ruh hynrei trei na ka bynta u paidbah ban wanrah ïa ki kam pynroi na ka bynta ka shnong ka thaw bad ka jingmyntoi jong u paidbah.
U Bah pynïaid u la ong ba ka jingleit shang kylleng ki jaka ki nongïalam ka VPP ban kam ïalade ba ki dei ki briew kiba ieid jaidbynriew ka dei ka jingpynthame katba ha ïing lajong pat thylli.
“Ka long kaei-kaei ka bym lah ban pdiang bad suki-suki ki 4 tylli konstitwensi kiba la jied ïa ki nongïalam na ka VPP kin sa sngewthuh haduh katno ki nongïalam jong ki ki ieid jaibynriew,” la bynrap u Bah Pynïaid.
Namar kata, u Bah Pynïaid u la ong ba ka jingkynthoh ki nongïalam ka VPP ïa ka Sorkar da kaba kynnoh bamsap, bad kam ba kin tei ïa ka lawei bad ieid jaitbynriew ka dei tang ka jingpynthame ïa ki paidbah ban ïoh jingkyrshan, bad haba ki nongïalam ka NPP ki dawa ban pyni ïa kita ki jingpynkhreh kiba bniah (blueprint) na ka bynta ka lawei kim nud ban sei hynrei ki shu kren bad kynnoh bamsap ïa ka Sorkar kaba ïalam da ka NPP khlem ki jingshisha.
“Peit bha ïa ka jingkren ki nongïalam jong ngi haduh bakut bad ki nongïalam jong ngi ki hikai ban sngewthuh. Dang kham lah ki nongïalam ka NPP kiba kren biria ïa ki jingshisha ban ïa kito kiba shu pynshit paidbah ban ïalam bakla. Lada don kata ka bamsap, ki dei ban pyni kaei bad hangno kata ka jingbamsap,” la ther u Bah Pynïaid, uba la bynrap ba ka VPP lei-lei ka la kjap bad pynjakhlia ïa ka jingmut jingpyrkhat ki paidbah da kaba pynsngewthuh bakla khamtam ïa ki samla kiba thrang shisha ban ïohi ïa ka lawei.
U la ong ba ka Sorkar ka la wanrah shibun ki sienjam na ka bynta ban tei ïa ka lawei ki khun samla naduh ka jingplie lad ban seng kam seng jam bad ïeng ha ki jong ki kjat lyngba ki tnat bapher-bapher kynthup ka tnat jngohkai pyrthei kiba lah ban aikam aijam.
