Peshawar, Lber:
Ha kawei ka jingjia, la ong ba uwei u ‘riew kheiñ duh uba ñiah ia kawei ka kali kaba kit ia ki bom hapoh ka la leit ban sum beit-beit sha ka jaka ba don ka kynhun ki heh Karikor nong China kiba pyntrei ia kawei projek den um ha ka thaiñ Northwest jong ka Pakistan ha ka Sngi Ba-ar. Ha kane ka jingjia 6 ngut ki la khlad ha shen na ka jingbthei jong ki bom ba la pyndait ha katei ka kali. Kane ka long ka sien kaba lai ba ki nong China kin shah thombor hapoh ka ri Pakistan. Katba ki jingjia thombor ar tylli sha khmat ki dei kiba la thmu ia ki bor pahara ne ki shipai ka Pakistan ha ki jaka treikam ba ju pyndonkam da ka China sha ka phang Southwest jong ka nongbah Balochistan ha kaba ka China ka la pynlut da ki Billion ha ki jingtei bad ki projek bapher bapher ha katei ka thaiñ.
La ong ba kitei heh karikor ki don ha lynti katba ki dang thmu ban leit phai na Islamabad sha ka jaka sah hajan katei ka jaka ba tei ia ka baden ha Dasu, kaba don hapoh ka thaiñ Khyber Pakhtunkhwa, la iathuh u heh pulit Mohammad Ali Gandapur.
Ha kane ka jingjia, la ong ba 5 ngut kitei kiba khlad ki dei ki nong China bad uwei pat u dei nongñiah kali ba kit ia kitei ki nong China ha katei ka sngi. Shuh shuh ruh la ong ba ka Dasu ka dei ka bynta ia kaba yn pynieng ia katei ka baden bad katei ka bynta ka dei kaba ki kam thombor jong ki lehnoh ki ju jur bha naduh ki por ba la leit, ha kaba 13 ngut ki la khlad kynthup ia 9 ngut ki nong China ha u snem 2021 ha ka jingshah pynbthei bom jong kawei ka bos da ki kynhun lehnoh kumba long ha kane hi ka sien.
Namar la ong ba ki heh karikor na China ki la pyntrei ia shibun bah ki projek hapoh Pakistan bad ka China ka la pynlut palat ia ka $65 Billion ha ka jing pyntrei ia ki projek bapher hapoh jong ka jing-iakut ‘China Pakistan Economic Corridor (CPEC)’ bad hapoh ka jingiatrei lang kaba hap ha ka ‘Belt & Road Initiative’ ba la wanrah da ka China. Kat haduh mynta la ong ba ym shym don kano-kano ruh ka kynhun lehnoh ka ban kam ne shim jingkit khlieh halor katei ka kam thombor kaba la jia ha ka Sngi Ba-ar bad kumjuh ruh ia katei ka jingshah pynbthei bom ka bos ha u snem 2021 ruh ym shym la don ba shim jingkit khlieh haduh mynta.
Namar la ong ruh ba ki lehnoh Islam ki ju kham treikam bha ha ki thaiñ Northwest ha Pakistan, kaba long ruh ka jaka ba kitei ki nong China ki ju kham shah thombor bha. Kumta ki pulit ka Pakhtunkhwa ki la leit mareh mar-mar sha katei ka jaka tang mar ia bna ia katei ka khubor hynrei kaba sngewsih ka long ba baroh kiba don ha katei ka kali ki la khlad lut bad kim shym la ioh ban pyllait im wat tang uwei ruh na ki.
La iathuh ba kitei kiba shah thombor ha kane ka por ruh ki dei na kajuh hi ka kompeni jong ka China kiba la shah thombor ha kitei ki lehnoh kumba long ha utei u snem 2021, ha kaba la hap ban pynsangeh noh ia katei ka jingtei dam da ki bun bnai namar jong katei ka jingshah thombor kitei ki heh nong China ha utei u snem.
Haba iadei bad kane, ka tnat ba dei khmih ia ki nong China hapoh Pakistan ka la dawa ia ki bor pyniaid bad ka tnat wad bniah jong ka Pakistan ba kin wad bniah bad bud dien haba iadei bad kane ka jingjia bad ba dei ruh ban shim khia ban ioh pynhiar kput ia kitei kiba don kti ha katei ka kam thombor ha kane ka sien.
