Vietnam, Lber:
Ka tnat ka koit ka khiah jong ka Vietnam ha ka Sngi Ba-ar ka la maham tyngeh halor ka jingma jong ka jingïap khlam ki sim ‘Bird Flu’ ha kaba uwei u khynnah pule 21 snem jong ka Vietnam u la khlad hadien ba u la kem pang ia na kane ka jingpang namar ka jingjur palat jong katei ka khlam ha katei ka nongbah. Utei u khynnah pule u dei u jong ka Nha Trang University bad u la khlad hadien ba u la shah ktah ha u jait khñiang jingpang ‘H5N1’ uba long u khñiang jingpang jong ka khlam ‘Bird Flu’. Utei u khynnah pule u la khlad ha ka 23 tarik jong une u Lber hynrei ka tnat ka koit ka khiah jong katei ka nongbah ka dang shu dep ioh shen ia ka kaiphod ba la wad bad pule bniah ia ki daw ka jingkhlad jong utei u khynnah ha katei ka por.
Kumta la ong ba ka jingïap jong utei u khynnah ha kane ka por, ka la wanrah jingma ia ki briew kiba im bad kiba shong ba sah ha kitei ki jaka ba katei ka khlam ka jur bad na ka liang ki heh ka koit ka khiah ki la kyntu ia ki paidbah ba kin ialeh ban kiar na kaba leit sha kitei ki thaiñ ba jur katei ka khlam. Hynrei kaba kham sngew lyngngoh ka long, ba ym shym la lap ksai ne shem ia ki sim bad ki syiar ba kin iap khlam na katei ka thaiñ ba utei u khynnah u sah watla ia ka khlam ‘Bird Flu’ la ïohsngew bad sakhi ha kiba bun ki bynta jong ka Vietnam naduh ba sdang u Kyllalyngkot jong une u snem 2024.
Ka tnat ka koit ka khiah jong ka Vietnam ka la pynpaw ka jingsngew khia haba iadei bad kane ka khubor bad ka ong ruh ba lehse ka dei ka jinglong- jingman jong ka suiñ bneng ha kine ki sngi kaba la ailad ia utei u khñiang jingpang ba un nang ioh bor bad ioh lad ban pur bha ha kine ki bnai.
Katkum ka kaiphod ba la pyllait da ka tnat pule bniah na katei ka ri, la iathuh ba uwei u khynnah pule na ka shnong Ninh Hoa jong ka thaiñ Khanh Hoa, naduh ka 11 tarik jong une u Lber u la ioh kem pang ia ki jingpang kum ka shit-met bad jyrhoh hynrei u la shu dih dawai hi na iing da ka jing antad ba ki long tang ki jingpang ba malu- mala kumba ju long ha kum kine ki aïom, hynrei la ong ba ka jinglong- jingman kam shym biang bad u la kem pang jur shuh shuh.
Kumta u la leit ban phah peit bniah ialade ha ka Ninh Hoa Medical Centre ha ka 16 bad 17 tarik jong u Lber 2024, ha kaba la pynkynriah noh ia u sha Khanh Hoa General Hospital naka bynta ki jingsumar ba kham bniah haba iadei bad kitei ki jingshitom jong u.
Katba, la ong ba ha ka 19 tarik u Lber 2024, ka Khanh Hoa Centre for Disease Control ka la shim ia ka snam na utei u khynnah ban peit thuh bad pule bniah ia katei ka jingshitom kaba u don bad katkum ka kaiphod ba la ioh na ka jingpeit bniah ba la leh ha ka 20 tarik u Lber 2024, la shem ba utei u khynnah u long ‘Positive’ ia utei u khñiang jingpang ‘A/H5’ bad la phah ia katei ka kaiphod sha ka Nha Trang Pasteur Institute ha ka 22 tarik u Lber 2024.
Namar ka jingjur palat jong kitei ki jingshitom ha ka met jong u, utei u khynnah u la khlad noh syndon ha ka 23 tarik jong une u Lber 2024 watla ki doktor ki la pyrshang ban sumar ia u katkum ki lad bad ka bor jingstad ba ki don.
