Shillong, Lber 27
Ka Khun Hynñiewtrep National Awakening Movement (KHNAM) ka la shim ïa ka rai ba ha kane ka ilekshon MP sha ïingdorbar Lok Sabha ka ban sa long ha ka 19 tarik u Ïaïong 2024 kan nym pynïeng kyrtong satia hynrei kan sa ai ïa ka jingkyrshan sha kyrtong jong kiwei pat ki seng.
Na ka liang U Nongsaiñ Hima haba ïoh ban ïakren bad u Working President ka KHNAM ha ka Lah Sngi U Blei, u Bah Thomas Passah u la ong ka daw ba ka seng kam pynïeng ïa la u jong u kyrtong ka dei namar ba ka seng ka kwah ban pynleit jingmut ha ka ilekshon MDC hapoh ka Khasi Hills Autonomous District Council (KHADC).
U Bah Thomas u la ong ba kam don jingmyntoi ïa ka seng ba kan pynpait ïa ka ‘vote’ jong ki paid ‘riewlum da kaba pynïeng shibun ngut ki kyrtong.
“Kam don jingmut re, te ngi la ong ba ngin pyrkhat ïalade tang na ka bynta ka MDC ilekshon shwa”, la ong u Bah Thomas.
Haba kylli ba ka KHNAM kan ai jingkyrshan ïa kano ka seng ha kane ka MP ilekshon, u Bah Thomas u la ong ba kum ka seng kan sa pynlong shwa da ka jingïalang ha kine ki taïew ban wan na ka bynta ban rai ïa u kyrtong ne ka seng ba ka KHNAM kan ai ïa ka jingkyrshan. U la ong ruh ba kum ka seng kan hap ban peit shwa kiei ki mat treikam jong kino-kino ki seng ne ki kyrtong ha kaba ïadei bad ki mat ki jura kiba ïatyngkhuh bad ka jylla khamtam kiba ïadei bad ki paid ‘riewlum.
“Ngi la dep ban pynlong shisien ïa ka jingïalang halor kane hynrei ngim pat rai pat ïano ngin kyrshan, hynrei ha kane ka taïew ban wan ngin sa pynlong jingïalang biang bad hangta ngin sa rai”, la ong u Bah Thomas.
Haba kylli kaei ka seng kaba u kwah ba kan jop napoh ka Shillong Parliamentary Constituency ha kane ka ilekshon MP, u Bah Thomas u la kren shai ba kum ka seng KHNAM baroh kawei ka kwah da ka sorkar ka bym dei kaba synshar da ka Bharatiya Janata Party(BJP) hapoh ka sorkar pdeng namar u la ong ba lada ka BJP kan dang ïai wan ha ka bor synshar, sa tang lano kin sa pyntreikam ïa ka Citizenship Registration Certificate nangta kan sa wan sa ka National Population Register(NPR), ka National Register of Citizens (NRC) bad kane kan wanrah jingeh ïa ki rit paid hapoh ka Ri India.
“Na ka bynta ka jingshngaiñ jong ngi shwa, ngi hap ban pyntikna ba ngin ïaid da ka sorkar ka bym don ka BJP”, la ong u Bah Thomas.
U Bah Thomas u la ïathuh ruh ba ki don ki seng kiba la phah shithi ban pan jingkyrshan hynrei ka seng kam shim satia ïa kano-kano ka rai namar teng-teng ka ju jia ba lada ki jied ïa kawei ka seng hynrei katei ka seng pat ha kaba khadduh ka leit ai jingkyrshan pynban ïa ka BJP.
“Ngi hap ban pyrkhat bha nadong shadong hashwa ba ngin shim ïa ka rai”, la ong u Bah Thomas.
