Shillong, Lber 27
U kyrtong ka NPP na Mawkynrew konstitwensi ha ka ilekshon MLA 2024, Bah Kansing Lynshiang, u la ong ba ki MLA ka Voice of the People Party ki kam ba dei ki briew kiba ieid ïa ka jaidbynriew tangba ki beh da wan pan jingïarap kiba duk.
U Bah Kansing u la ong ïa kine ki kyntien haba pan jingkyrshan na ki paidbah ka Mawkynrew ha shnong Laitkyrhong kaba la long ha ka janmiet ka 27 tarik Lber 2024 ban jied ïa ka kyrtong ka NPP ka Kong Ampareen Lyngdoh ha ka jingïadonlang u MDC ka Rambrai-Jyrngam, Bah Bajop Pyngrope, Bah HM Shangpliang, ki nongkitkam ka NPP bad ki nongkyrshan.
U Bah Kansing u la ong wat la u khlem jop, hynrei haba wan pan jingïarap ki paidbah baduk u pyrshang ban ïarap kat ka bor bad bynrap ruh da kaba ong, ban long MLA kaba la ïoh ïa ka tulop bad ka skhim ban beh ïa ki paidbah kiba pang ba shitom kam sngewïahap.
“Ban ïoh lok khlem bsa ïa ki khun, ka lok dangstep ka la beh na ïing, kumjuh ruh ka jia ïa ki MLA haba ki la shah jied ki hap ban ïarap ïa ki paidbah” u la ong.
U la ong ruh ba ha kine ki saw snem kaba u don ha ka sorkar ba la ïalam ka NPP un long u nongïarap ïa ka eh ka shon jong ki paidbah.
U la ïathuh ba kawei ka longkmie ka la mut ban leit kyrshan ïa kita ki seng ieid jaidbynriew hynrei haba thiah hospital u khun, ka pisa ka poi palat 2 lak bad kumta ka pyntip sha u bad u la leit ban ïarap bad khatduh kata ka longkmie ka la ong ba kan ym donkam shuh ban bud ïa ki seng ieid jaidbynriew ki bym lah ban ïarap ïa ki haba ki ïakynduh jingeh.
“Phi ong ka dei ka seng bakhuid bym bamsap, to kloh ïa u ngap ha ka ksing da phim jliah lada ka bit ka umngap ha kti, ngan nym ngeit” u la ong.
Ha kajuh ka por u la ong ïa u nongïalam ka VPP ba ym dei ban khring ‘vote’ na ki paidbah da kaba kynnoh ïa ki nongïalam Balang.
Namar kata, u don jingkyrmen ba ka NPP kan sa khlaiñ ha Mawkynrew konstitwensi da ka jingïatreilang ma u bad u MLA ba mynta u Bah Banteidor Lyngdoh.
Na ka liang u Bah Bajop u la ong ba u kyrtong ka VPP, Dr. Ricky AJ Syngkon bad u Bah Ardent Basaïawmoit ki la don ka jingïapher jingmut namar ki MLA ha ïingdorbar ki pyrshah ïa u Lat ka jylla ban kren Hindi, katba u Dr Syngkon u ong un nym pyrshah ban kren Hindi.
