Shillong, Lber:
U MDC ka NPP na Rambrai-Jyrngam, Bah Bajop Pyngrope, u la ong ba ka jingkynnoh ka VPP ba ka jylla ka la hiar arsut bad ba kam shym la don ka roi ka par hapoh jylla, ki long ki bym don nongrim hynrei ba la shu kynnoh tang ban pynthohbria ïa ka Sorkar.
U Bah Bajop u la kren ïa kane ha ka Lah Sngi U Blei ha ka jingïalang pdiang ïa ki spah ngut ki samla Congress sha ka NPP ba la pynlong ha Nongkseh Indoor Hall ha Nongkseh. Une u MDC ka Rambrai bad uba long uwei na ki nongïalam ka NPP u la ong, ka jingkren jong ki nongïalam ka VPP teng-teng la sngew kumba pynïoh ma ki ïa ka jylla Meghalaya.
Ki ong ba ka jylla ka la hiar arsut naduh u snem 2018, hynrei kane ka seng ka dang mih ha u snem 2022, hynrei ki dei ban tip ba kane ka sorkar hapoh ka jingïalam ka NPP ka la shna bun ki surok kiba la pynsuk ïa ka leit ka wan ki paidbah.
“Nga kwah ban ong ïa ki nongïalam ka VPP, kiba ong ba ym don roi don par hapoh jylla, ba kum uwei u samla MDC ba nga la ïaid kylleng nga wer ïa ki nongïalam VPP ba ngan ïalam ïa ki sha kine ki surok thymmai ba ka sorkar hapoh ka jingïalam ka NPP ka la shna ha kine ki khyndiat snem.
Ngan pyntheh ma nga ka petrol bad ngan ai kali ma nga ba kin leit, ba kin sakhi da la ki khmat ïa kine ki surok ba la shna ha kylleng ki bynta jong ka jylla,” la ong u Bah Bajop. U la ong ba kane ka sorkar ka la shna bun bah ki surok thymmai, bad ai nuksa ha ki por ba la leit, ka surok na Jowai, Amlarem sha Dawki ka sniew bha bad shimpor, hynrei mynta ka la bha bad ka la pynsuk shi kat dei ïa ki nongleit-nongwan. Kumjuh ruh ki surok ha South West Khasi Hills District kum ka Ranikor, Borsora, Bakli ki la bha bad ruh ki surok ba bun hapoh ka Rambrai-Jyrngam Constituency ki la bha khamtam ka surok na Nongstoiñ sha Rambrai, la ong u Bah Bajop.
“Ngam shym la shu kren lamler ne kob, hynrei nga kren hadien ba nga la shem bad lap da la ki jong ki khmat, kumta nga ïawer ïa ki ba kin leit sakhi lang da la ki khmat lajong ban lap ïa ki jingshisha ym tang ban shu kynnoh khlem sakhi,” la ong une u MDC ka Rambrai-Jyrngam.
