Bengaluru, Lber:
U heh nongïalam jong ka seng Congress ha Karnataka bad u Symbud Myntri Rangbah jong ka jylla u DK Shivakumar u la kynnoh ïa ka sorkar kmie ba ka la leh meinah ïa ka jylla ha kaba ïadei bad ki jingkyrshan pisa na ka bynta kiba bun ki Project ban wanrah ïa ki kam pynroi ha kum kane ka por ba dang ïakynduh jingeh na ka jingtyrkhong um.
Ha ka jingïakren bad ki nongthoh khubor, haba la buh jingkylli halor ka jingduna jong ka jingïoh jingkyrshan na ka bynta ban pyntreikam ïa ki Project, u K Shivakumar u la ong, “…Ha Karnataka, ka la dei ban don ka jingïatreilang jong ka sorkar jylla bad ka sorkar kmie. U Myntri Rangbah u Bommai, ha ka por ba u dang don ha ka bor synshar, u la ong hi hapoh ïingdorbar ba ngin sa hap ban ïakhun na ka bynta ban ïasam.””Ngam shym kren ïa kaei kaei kaba heh, ka la don ka MGNREGA skhim, ha kaba haman ki por ba ïakynduh jingeh na ka jingtyrkong um ki la hap ai jingbit ïa ngi ban trei da 150 sngi, hynrei ki la ailad tang 100 sngi, ki la dei ban ai tam sa kumba 50 sngi. Kane ka dei ka aiñ jong ka ri, kane ka la dei ban long na ka bynta baroh. Ngi la don kumba 200 tylli ki thaiñ kiba la ngat ha ka jingtyrkhong um, hynrei ym ju ïoh wat tang shi pisa ruh ban ai ha kaba ïadei bad ka jingkyrshan halor ka jingrang tyrkong. U Myntri Rangbah bad ki Myntri ki la leit ban ïakynduh ïa u Myntri Rangbahduh, u Myntri ka tnat ki kam pohïing bad kiwei pat ki Myntri ka sorkar kmie, na ka bynta ban buh ka jingkyrpad ïa ki. Hynrei kim ju ai ei ei,” la ong u nongïalam jong ka seng Congress.
