Nongstoiñ, Lber 27
Ban pynsah nam ïa la ki jong ki kñi kiba la don bynta ha ka jingïakhun ïa ka jingïaleh ban pynïoh ïa ka Jylla ba pura, ha ka Sngi Balang ka Kur Lyngkhoi 3 Kpoh na West Khasi Hills District ka la pynkup burom ïa 7 ngut shipara kiba la ïakhun Hill State bad kiba la shah set patok ha kane ka jingïakhun.
Ïa kitei 7 ngut shipara na ka Kur Lyngkhoi 3 Kpoh la ïoh ban pynkup burom ha ka jingïalang kaba la long ha ka Dorbar Kur ha ka shnong Siejlieh, West Khasi Hills District ha kaba u samla Lambokstarwell Marngar, President ka KSU Sengkmie u la long kum kongsan.
Kine 7 ngut kiba la shah pynkup burom ki kynthup ïa u Bah Exslandly Lyngkhoi, Darlingstone Lyngkhoi, Ospiar Lyngkhoi, Delliosping Lyngkhoi, Bet Lyngkhoi bad ar ngut ki dei ba la khlad noh na kane ka sla pyrthei kata u Polin Lyngkhoi bad Bah Sking Lyngkhoi.
U samla Lambokstarwell haba kren kum u kongsan u la ong, ki shipai ïakhun Hill States ha kito ki por kynthup ïa ki 7 ngut na ka Kur Lyngkhoi ki dei kita ki shipai barieh jong ka jaidbynriew. Kine ki shipai ka jaidbynriew ki sdang paw pyrthei tad haduh jong ka jingrakhe ka Jylla ïa ka lyngkhuh snem kaba 50. Haba pyrshang ban ïaid kylleng ka bri u hynñiewtrep, la lap ba ki dang bun ki r’iew len lade kiba ka sorkar kam shym lah ban ithuh.
“Kane ka sngi kan pynkynmaw ïa ki khun samla ka Kur Lyngkhoi ba kaei ka bynta ba ngi dei ban leh katba dang im ha ka sla pyrthei, ka jinglong samla ka wan tang shisien bad ka jingim ruh ka wan tang shisien bad ka jingkylli ka long ba ynda ngi la leit noh na ka sla pyrthei kaei pat kata ka nongmuna ka jong ngi ba ngin ai sha ka pateng ban dang wan,” la ong u samla Lambokstar.
Shuh shuh u samla Lambokstarwell u la ong, “Don ki kmie ki kpa kiba ong ïa ki khun ba lada rung sha ka KSU yn sa shah set patok bad shah kem ha ki pulit hynrei nga shu kwah ban pashat ba lada don ki khun samla ba thrang ban shakri ïa ka ri bad ka jaidbynriew wat nym khang ïa ki hynrei dei ban pynshlur bad ai mynsiem ïa ki.”
“Ka along hi kam dei tang ka jaka ban set ïa ki nongtuh nongthiem ne nongleh kam sniew bad nga shu kwah ban ong ba lada ka jingim u Tirot Sing ka kut ha ïing byndi, ngi ñiew tang ïa u mynta kum u khla wait ka jaidbynriew bad lada ïa u Woh Kiang Nangbah la sdien phasi ym na ki kam sniew kumjuh u Nelson Mandela, 27 snem u shong ha ïing byndi hynrei haduh mynta ki ñiew kum u ‘riewkhraw ka Ri South Africa,” u la ong.
Ha katei ka sngi, la donlang ruh ki nongïalam ka KSU West Khasi Hills District, u Bah PBH Tympuiñ, Sordar Shnong Siejlieh, u Secretary shnong, u rangbah dong bad ki kur ki jait Lyngkhoi lai kpoh bad kiwei kiwei.
