Shillong, Lber 27
Ha ka janmiet jong ka Sngi Balang ki pulit ki la lap ïa ar tylli ki metïap jong bar jylla ba la suba jur ba ka jingkhlad ka lah ban dei na ka jingshah bom ïap ha ka shnong Ichamati kaba dang hap hapoh ka Sohra Civil Sub Division.
Katkum ka jingpyntip ba la ai da u Superintendent of Police (SP) ka East Khasi Hills, la ong ba ar ngut ki bar jylla kiba la suba shah bom ïap ki dei ba la tip kyrteng kum u Esan Sing bad u Sujit Dutta, ha kaba ïa ka metïap jong ki la lap na Ichamati bad Dalda.
Ha kaba ïadei bad kane, ki pulit ka Majai Outpost bad kumjuh na Sohra ki la hiar mar-mar sha katei ka jaka ban peitngor ba kan nym don ka jingmih jingkulmar.
Nalor ki pulit kiba la don lypa, na ka liang ka tnat pulit ka la phah syndon da ki Special Operation Team (SOT) lem bad ka kynhun Crime Scene Unit sha Ichamati, Shella, ban ïarap ïa ki pulit kiba la don lypa bad khamtam lei ban tem bad peit ba kan nym don kano-kano ka jingmih huri-hura ne ktah ïa ka shongsuk shongsaiñ.
Katkum ka khubor la ong ba hadien kane ka jingjia, ka jinglong-jingman ha Ichamati bad ki shnong ba marjan ka la shongsyier bha. Halor kane, na ka liang ka tnat pulit ruh ka la bthah ba dei ban pynkhlaiñ ïa ki bor pahara ha ka thaiñ Ichamati ban peitngor ba kan nym don kano-kano ka jingkulmar bad pynmih ïa ka jingsngew pher jaidbynriew.
