Mahendraganj, Lber 27
U Myntri Rangbah ka Jylla, u Conrad K. Sangma ha ka Sngi Balang u la kyrpad ïa ka jingkyrshan jong ki paidbah ban jied biang ïa ka MP ka Lok Sabha, ka Agatha K. Sangma ha ka sien kaba saw.
Haba ai jingkren ha kiba bun ki jingïalang ha ki jaka bapher-bapher jong ka Salmanpara ba kynthup ïa ka Gopinatkilla bad ka Chapahati, u Sangma u la pan jingkyrshan na ki paidbah nongthep ‘vote’ da kaba pynsngew ïa u synñiang u bynhei kiba u kpa jong u, u P.A. Sangma (Bam Kwai ha Dwar U Blei) u la noh.
“Kum u Myntri Rangbah, haba nga leit sha Delhi, nga ïoh ka jingithuh namar u synñiang u bynhei jong u kpa jong nga sha ka kam saiñ pyrthei. Ka para jong nga, ka Agatha Sangma ka la long ka MP ka Tura Lok Sabha la lai sien, bad ka la pynsngew ïa ki jingsngewkhia ym tang jong ka Meghalaya bad ka thaiñ Shatei Lam Mihngi hynrei jong ki trai-ri bad ki Khristan,” u la ong, da kaba bynrap ba ki nongïalam ha Delhi ki la pynleit jingmut bad shimkhia ïa ka sur jong ka.
Haba ai khublei ïa u Myntri Rangbahduh ka ri, u Narendra Modi bad ka BJP halor ka jingkner jingkyrshan ïa ka Agatha, utei u khlieh ka NPP, u la ong, “U Myntri Rangbahduh ka ri, u Modi u la pyni ïa ka jingburom ïa ka kyrtong jong ngi, ka Agatha Sangma bad kdew shai ïa ka jingieid bad jingburom jong ki kaba ki don ïa u kpa bad ka para jong nga. Nga da ai khublei biang ïa u (Myntri Rangbahduh), Myntri ka tnad kam pohïing (Amit Shah) bad ki nongïalam ka BJP.”
U Sangma u la ai jingïaroh ruh ïa u Modi halor ka jingpyntyllun sted jong u ha ka liang ka jingkiew ka roi ka par ha ka thaiñ Shatei Lam Mihngi. U la ong ba u Myntri Rangbahduh u la ïohi lypa ïa ka lawei ba phyrnai na bynta ka ri bad haba phai sha ka khana jong ka roi ka kiew ka India, ka Meghalaya kan don ïa ka bynta ba kongsan.
“Ka India ka la kiew shaphrang bad shen ngin sa long kawei na ki ri kaba heh tam ha ka liang ka ïoh ka kot ha ka pyrthei. Bad ynda ka India ka la long kawei na ki 3 tylli ki radbah ha ka liang ka ïoh ka kot, ka Meghalaya khlem pep kan don bynta ha kane ka khana jong ka roi ka kiew,” u la bynrap. Haba pan jingkyrshan na ki paidbah, u la kyrpad ïa ka jingïatreilang na ki nongthep ‘vote’ ban pynkhlaiñ ïa ka NPP hapoh ka Jylla. U la ïathuh ba ka NPP ka la lah ban pyntyllun ïa ka ‘agenda’ jong ka roi ka kiew bad sdang ïa ki kam pynroi ha kylleng ka Jylla.
“Kane ka ilekshon ka long kaba donkam ban bteng ïa ka khana jong ka roi ka kiew ka Meghalaya bad ban pyni ïa ka jingshaniah jong ki paidbah ha ka NPP bad ki nongïalam jong ka,” u la ong, da kaba ai khublei ruh ïa ki paidbah nongthep ‘vote’ halor ka jingjop jong ka NPP ha ki 2 tylli ki ilekshon ba la dep sha ka ïingdorbar thawaiñ hapoh ka Jylla.
“Ka lyer jong ka NPP ha kylleng ka Meghalaya ka long kaba khlaiñ bad ka sur jong ka seng yn hap ban ïohsngew shai bad kyndiang hapoh Lok Sabha,” u la ban jur.
Ïa u khlieh ka NPP, la synran lang da ka MP, ka Agatha K. Sangma, ki MLA – Sanjay Sangma, Ian Botham Sangma bad ka kurim u P.A. Sangma, ka Soradini K. Sangma.
Ha ka Sngi Balang, u Sangma u la ai jingkren ha ki jingïalang kiba la long ha Gopinatkilla, Chapahati, Tungrurchar, Daspara bad Nandichor, South West Garo Hills. Haba pan jingkyrshan na ki paidbah, ka Agatha K. Sangma ka la ong, “Ki paidbah ki dei ban ‘vote’ ïa ka NPP bad pyni ïa ka jingshaniah jong ki hapoh ka jingïalam u Conrad K. Sangma. Kum ka MP, ngan ïai bteng ban long ka sur jong phi hapoh Parliament ban pynsngew ïa ki mat ki jura jong ki briew jong ngi kumjuh ban ïai kyntiew ïa ka Meghalaya bad ka ri kumjuh.”
Ha ka jingïalang mynta ka sngi, la pdiang burom ruh ïa u CEM barim ka GHADC bad nongïalam ka BJP, Dipul Marak, uba la ieh noh kam dang shen na ka seng. Ha Mahendraganj, u nongsynran uba ïajan bha bad u P.A. Sangma, u Mohammad Abul u la ieh noh kam na ka TMC bad pynïasoh sha ka NPP.
