Shillong, Lber:
U Secretary ka Regional Democratic Alliance (RDA), Bah K.P. Pangniang ha ka Sngi Ba-ar u la ong ba ym lah ban kheiñ dew thala ïa ki nongïalam jong ki 2 tylli ki seng ‘riewlum ka Jylla ba kynthup ïa ka UDP bad ka HSPDP.
U Bah Pangniang u la kren ïa katei haba jubab ïa ka jingkylli halor ka jingkyntu u nongïalam ka VPP, Bah Ardent M. Basaïawmoit ba ka RDA ka dei ban weng noh na ka jingïakhun ha ka ilekshon MP ban wan. Haba kdew ba katei ka jingkren ka long kaba khlem nongrim, utei u nongïalam u la ong ba kan jin da la bha lada kylli na u Bah Ardent halor ka jingmut jong u haba u la seng ïa ka RDA ha u snem 2017.
“Ngim lah ban kheiñ dew thala ïa ki nongïalam jong kine ki 2 seng. Ka HSPDP ka la ïaid la 52 tylli ki snem, ka UDP la 27 tylli ki snem. Ka bha ba phin kylli na i (Ardent) namar ngi pynneh ïa kaei kaba ki nongïalam jong ngi baroh shi katto ki snem ki la ai ka jingshakri naduh ba ngi ïakhun ïa ka Jylla lajong bad ter-ter,” la ong utei u nongïalam haba kren sha ki lad pathai khubor hadien ka jingwan thep kyrteng u kyrtong ka RDA, Bah Robertjune Kharjahrin.
U la ong ruh ba kine ki 2 tylli ki seng ‘riewlum ki dei kiba u paidbah u la shaniah, burom bad ai ka rai bad kumta, kum ki nongïalam, ki burom ïa kata.
“Ka jingkylli ban weng, ïa kata nga sngew, ngim don eiei ban pynshong nongrim ïa ka,” u la ong. Ha kawei ka liang, u Bah Pangniang u la pynpaw ka jingkyrmen skhem ba ka RDA kan poi sha ka thong ha kane ka ilekshon MP naba kum ki nongïalam ki la ïohi ïa ka jingkwah jong ki paidbah ba ki seng ‘riewlum kin ïatreilang.
Haba pynkynmaw ïa ka rai u paidbah ha ka ilekshon MLA ba la dep, u la ong ba lada kheiñ kyllum lang, ka jingïoh ‘vote’ jong ki 2 seng (UDP & HSPDP) ka long palat 3, 65,000 eiei. “Kane ka pyni ba ki paidbah ki kwah ïa ki seng ‘riewlum. Ngi dei ki seng ‘riewlum kiba u paidbah u la ai ka jingshaniah,” u la ong.
Shuh shuh u la bynrap ba ki 2 seng ki ïai bteng ban pynneh-pynsah ïa ka RDA kaba la sdang ha u snem 2017-18, naba ka nongrim ka RDA ka donkam ïa ki ‘riewlum khnang ban ïoh ïa ka jingshaniah u paidbah kumjuh ka jingjop na ka jingkyrshan u paidbah.
“Kumta ngi pynneh, pynskhem bad pynbha ïa ka RDA ha ryngkat ka sur u paidbah kaba ki la ai ha ka ileskhon 2023,” la ong u Secretary ka RDA.
