Shillong, Lber 27
U President ka Voice of the People Party (VPP), Bah Ardent M. Basaïawmoit ha ka Sngi Balang u la ong ba ka nongrim jong ka seng ka long ban khmih ba yn ym don mano-mano kiba lah ban leh trai-khlieh ïa ka jaidbynriew.
Haba ai jingkren ha ka jingïalang kaba la long ha Mawsynram, u Bah Basaïawmoit u la ong ba lada don mano-mano uba lah ban pynshisha ba u (Ardent) la leh ïa ka kam sniew ha ka por ba u bat kum u CEM ka KHA DC, un ym bteng shuh ïa kam kaba u shakri mynta.
Haba kdew ba ka seng da lei-lei kam lah ban ïapeiñ ïa ka nongrim, u President u la ong, “Ïa ka hok jong u trai-muluk, trai jaka, ngin ym ïapeiñ. Ka jingmih jong ka VPP ka dei ban ïada ïa ka hok longtrai jong ngi u trai-muluk, u trai jaka. Hooid ïa u nongwei uba la kha, la pun, uba la heh hangne, hato long mo ban shu beh shnong noh ïa ki baroh…em, kata ka bym lah long.”
U la ong ruh ba ïa kiba kum kita yn hap peit kiei ki jingeh, ka jingïada kaba lah ban ai ha ka ïaid ka ïeng ne ka kamai-kajih jong ki, hynrei kan long katkum ka lynti kaba dei.
“Ym don kano-kano ka Jylla ha ka ri ka ban don thik tang ki trai-shnong, hynrei u trai-shnong u long halor. Kata kaba ngi-ngi kwah, ym lah ban ong ba ngin ïa don tang para Khasi hangne, hynrei ngin peit keiñ ba yn ym don kiwei pat kiba lah ban leh trai khlieh ïa ngi ka jaidbynriew. Kata ka dei ka nongrim jong ka VPP,” la ong utei u nongïalam da kaba bynrap ba yn khang lad ïa kiba wan buhai shnong ne kiba wan rung be-aiñ.
Halor ka jingbym pynïeng kyrtong ka BJP hapoh ka Jylla, u Bah Basaïawmoit u la ong ba ka seng (BJP) namarba kam lah ban suhthied hapoh Meghalaya, kumta ka la rai ban kyrshan noh ïa ka NPP.
“Haba kumne, ym dei NPP-BJP bhai-bhai…phi wan ha Meghalaya ha ka dur jong ka NPP, katba phi dei ka BJP kaba la pynïaid. Na kata ka daw phi kam trai ba ïa ka Meghalaya ‘ngi synshar’…balei ki lah ban synshar, balei ka NPP kam nud ban ong em, ym dei ka BJP kaba synshar…kim nud,” u la ong.
Kumjuh, halor ka jingkynnoh u Amit Shah ba ka Sorkar Meghalaya ka dei kaba bamsap tam, u la ong ba ym don ba nud ban phah pynshisha ïa u Shah haba ïadei bad katei ka bynta katba u Symbud Myntri Rangbah ka Jylla u phah pynshisha ïa u Bah Ardent halor ka bamsap,
“Ïa nga, u Symbud Myntri Rangbah u ong pynshisha, ïa u Amit Shah pat um nud. Nga ong ïa u paidbah, ai lad ka bor ïa ngi ba ngin synshar, ngin sei madan lut ïa ka bamsap baroh bad kiba dei ban pynshitom ngin pynshitom, ngin ym map. Ai ïa ngi ka bor…ngim pat don te ka bor, ngin pynshisha kumno,” u la ong.
Ha kawei ka liang u Bah Basaïawmoit u la pynshai ba u khlem kynnoh ba ki tymmenbasan ki sam pisa hynrei u ïathuh ïa ka jinglong jong ka saiñ pyrthei ba ki briew ki ong ba ha ka saiñ pyrthei ym lah ban pynkhuid bad don kiba ong ba ha ka saiñ pyrthei, u ksuid bad u angel ki ïaid lang.
“Ngi ong kata kam dei ka saiñ pyrthei jong ngi, ka saiñ pyrthei ha ngi ka dei ka saiñdur jong U Blei…kat haduh ba ka don ka jingïapur ba kita ki nongïalam Balang ruh ki ïadon bynta…nga ong ka don ka jingïakren, nga khlem kynnoh ïano-ïano. Lada ka don, nga ong ba kan long kaei-kaei kaba ktah ïa ka burom jong ka niam bad Balang Khristan,” u la ong.
Shuh shuh utei u nongïalam u la pynshai ba ka seng ka pyrshah ïa ka jingkren Hindi hapoh ïingdorbar thaw aiñ namar ka Meghalaya kam dei ka Jylla kaba kren ïa ka ktien Hindi.
