Shillong, Lber 27
Da ka jingthep kyrteng u kyrtong ka TMC, u Zenith Sangma ban ïakhun ïa ka ilekshon sha Ïingdorbar Lok Sabha na Tura, baroh ki kyrtong kiba la thep kyrteng ki long 10 ngut haduh ka sngi bakut jong ka jingthep kyrteng ha ka Sngi Balang.
U Zenith uba long u Myntri Sorkar barim bad MLA barim uba ju mihkhmat ïa ka Rangsakona konstitwensi u la leit ban thep kyrteng ha ka Sngi Balang ha ryngkat ka jingsynran lang u nongïalam ka TMC u Dr Mukul Sangma nalor kiwei pat ki nongïalam.
Da ka jingthep kyrteng u Zenith, baroh ki kyrtong kiba la thep kyrteng ban ïakhun ïa ka ilekshon sha Ïingdorbar Lok Sabha na Shillong bad Tura Lok Sabha konstitwensi ki long 10 ngut.
Kiwei pat ki kyrtong kiba la thep kyrteng na Tura konstitwensi ki long ka Agatha K Sangma kaba dei ka MP bad ka kyrtong ka National People’s Party (NPP), u Saleng A Sangma kum u kyrtong ka Congress nalor u Labenn Ch Marak kum u kyrtong shimet.
Kiba ïakhun na Shillong Parliamentary konstitwensi ki long u Bah Vincent H Pala uba dei u MP bad u kyrtong ka Congress, u Bah Robertjune Kharjahrin kum u kyrtong ka United Democratic Party (UDP) uba kyrshan lang da ka Regional Democratic Alliance (RDA), ka Kong Ampareen Lyngdoh kaba dei ka Myntri Sorkar bad ka kyrtong ka NPP, u Dr Ricky AJ Syngkon uba dei u kyrtong ka Voice of the People Party (VPP), Prof Lakhon Kma uba ïakhun kum u kyrtong shimet nalor u Bah Peter Shallam uba mih ruh kum u kyrtong shimet.
Baroh ki kyrtong kiba thep kyrteng ki long 10 ngut na kine ar tylli ki konstitwensi; 6 ngut na Shillong Parliamentary konstitwensi bad 4 ngut na Tura konstitwensi.
Ka jingpeit bniah ïa ki kot ki sla jong ki kyrtong kiba la thep kyrteng ban ïakhun ïa ka ilekshon kan long ha kamra treikam u Returning Officer ha ka Sngi Palei ha ka por 3 baje janmiet.
